Мишкәлә яңы ойошма төҙөлә

Фин-уғыр халыҡтары төркөмөнә ҡараған мари халҡын һаҡлау маҡсатында Мишкә районында “Самырык” урындағы йәштәр йәмәғәт ойошмаһы төҙөү тураһында идея барлыҡҡа килде. Мари телендәге исеме берекмәнең мәғәнәһен тулыһынса асыҡлай, “йәш быуын” тигәнде аңлата ул.
Ошо уңайҙан үткәрелгән йыйылышта район хакимиәте башлығының социаль мәсьәләләр һәм эске сәйәсәт буйынса урынбаҫары Лариса Александрова, Башҡортостан Республикаһының “Эрвел мари” Мари милли-мәҙәни автономияһы” төбәк йәмәғәт ойошмаһы рәйесе Радион Плотников, Мишкә районы “Эрвел мари” Мари милли-мәҙәни автономияһы” урындағы йәмәғәт ойошмаһы рәйесе Валерий Байбулатов, Башҡортостан Республикаһы Халыҡтар дуҫлығы йорто филиалы мари тарихи-мәҙәни үҙәктең баш белгесе Алексей Ибулаев, шулай уҡ мәктәп директорҙары, мари теле уҡытыусылары, уҡыусылар, ауыл биләмәләре башлыҡтары, агросәнәғәт колледжы студенттары ҡатнашты.
— Йәмәғәт ойошмалары, башлыса, хеҙмәт эшмәкәрлеге алып барған олораҡ йәштәгеләрҙе һәм йәштәрҙе берләштергәнгә күнеккәнбеҙ. Шуға ла үткәрелгән сараларға райондың йәш граждандарын да йәлеп итке килә, — тине үҙ сығышында Лариса Александрова. — Республиканың ҡайһы бер муниципалитетында район мари йәштәр ойошмалары асылған да инде. Мишкәлә лә яңы хәрәкәт төҙөлөүе ҡыуаныслы. Барлыҡ ҡатнашыусыларға ла һөҙөмтәле эш теләйем. Хәйерле юл!

Йәштәр хәрәкәтенең эше нисегерәк ойоштороласағы хаҡында Радион Плотников һөйләне:
— Йәмәғәт ойошмалары етәкселәре ҙур тәжрибәгә эйә, уларҙы йәш быуынға тапшырырға кәрәк. Хәҙерге йәштәрҙең инициативалы булыуы менән килешәһегеҙҙер. Шуға ла уларға дөрөҫ йүнәлеш бирергә кәрәк. Йәмәғәт ойошмалары төрлө грант конкурстарында ҡатнашырға хоҡуҡлы, ә унда еңеү өсөн ҡыҙыҡһыныусанлыҡ, әүҙемлек һәм берҙәм тырышлыҡ менән һуғарылған аныҡ эш кәрәк. Уҡыусыларға, минең уйымса, был хәрәкәттә ҡатнашыу уларҙың белем даирәһен үҫтерергә, яңы кешеләр менән аралашырға өйрәнергә, командала эшләргә мөмкинлек бирәсәк. Беҙ бергәләп идеялар уйлап сығарасаҡбыҙ, улар район халҡына файҙа килтерһен өсөн уй-теләктәрҙе тормошҡа ашырырбыҙ.
Йәмәғәт эшендәге берҙәмлек, һис шикһеҙ, уңыш нигеҙе булып тора. Был фекер менән Алексей Ибулаев та килешә:
— Әгәр ҙә беҙ һаҡламаһаҡ, кем һаҡлар мари динен, беҙҙең милли йолаларҙы һәм традицияларҙы? Эйе, беҙгә ауырлыҡтар менән дә осрашырға тура килер, бәлки. Ләкин һәр эште башлағанда был була торған хәл. Беҙ бергәләп эшләһәк, тырышһаҡ, һөҙөмтә оҙаҡ көттөрмәҫ. Мари халҡы вәкилдәре булараҡ, беҙ һоҡланғыс һәм үҙенсәлекле мәҙәниәтебеҙҙе һаҡларға тейеш.
50-нән артыҡ кеше ҡатнашҡан йыйылышта берҙәм тауыш биреү юлы менән Мишкә районының “Самырык” йәштәр йәмәғәт ойошмаһы рәйесе итеп район Мәҙәниәт йортоноң мәҙәни саралар ойоштороусыһы Анастасия Ялкаева һайланды.

Виктория Ишмырҙина.
Мишкә районы.