Әүҙем, тырыш, һәләтле ғаилә

Район үҙәгенән ситтә урынлашҡан Тепляк ауылында йәшәүсе Айгөл һәм Илшат Шәйнуровтар ғаиләһе лә шундайҙарҙың береһе. Улар икеһе лә ауылдың иркен болондарында уйнап үҫкән, бала саҡтан хеҙмәт тәрбиәһе алған.
Айгөл Зәлиф ҡыҙы Ҡаҙағстандың Ялты ҡасабаһында тыуған. 1980 йылдарҙа ата-әсәһе Тепляк ауылына ҡайтып төпләнә. Мәктәпте тамамлағас, ҡыҙ Нефтекама ҡалаһында ашнаҡсы-кондитер һөнәренә уҡып сығып, ауыл мәктәбендә ашнаҡсы булып эшләй. Әлеге ваҡытта Айгөл — китапханасы.
Ғаилә башлығы Илшат Фәдис улы — Тепляк ауылы егете. Мәктәпте тамамлағас, Башҡорт дәүләт аграр университетында ветеринария табибына уҡып сыға. “Заря” хужалығында хеҙмәт юлын башлай. Ветеринария табибы, зоотехник булып оҙаҡ йылдар эшләй. Ауыл старостаһы, ауыл Советы депутаты була. Һуңғы йылдарҙа клуб мөдире булып хеҙмәт һала.
Айгөл менән Илшат мәктәптән үк дуҫ була, һуңынан йәштәр араһында мөхәббәт хистәре тыуа. Уларҙың ғаилә ҡороуына үткән йыл 30 йыл тулған. Өс ул тәрбиәләп үҫтереп, оло тормош юлына сығаралар. Өсөһө лә Нефтекама ҡалаһында йәшәй. Шәйнуровтарҙың ике ейәне бар.
Ауылда йәшәүе ауыр, аҡса юҡ, тигәндәргә ысын мәғәнәһендә өлгө күрһәтә был тырыш ғаилә.
— Ауыл ерендә йәшәгәс, нисек инде шәхси хужалыҡта мал ҡарамайһың, баҡсала бәрәңге, йәшелсә, еләк-емеш үҫтермәйһең. Һыйлы көнөң һыйырҙан, тигәндәй, үҙең етештергән продукциянан өҫтәл тултырып ризыҡ әҙерләргә була. Балалар ҙа йәштән хеҙмәт сынығыуы алып үҫә, — ти Айгөл Шәйнурова. — Үҙебеҙҙең баҫыу бар, унда ашлыҡ сәсәбеҙ. Яҙҙан көҙгә тиклем баҫыу менән мәшғүлбеҙ. Техникабыҙ ҙа бар. Ауылда үткән өмәләрҙә Илшат трактор менән ярҙам итә.
Теплякта мәҙәни мираҫты, йолаларҙы һаҡлап йәшәй Шәйнуровтар.
— Эшемде яратып башҡарам. Клубта ауыл халҡы ҡатнашлығында “Сударушка” фольклор ансамбле эшләй, — тип дауам итә китапханасы. — Төрлө байрамдарҙа ауыл халҡы өсөн концерт ҡуябыҙ, районда ойошторолған сараларҙа әүҙем ҡатнашабыҙ. Халҡыбыҙҙың мәҙәни мираҫын, ғөрөф-ғәҙәттәрен һаҡларға, уларҙы йәш быуынға тапшырырға, балаларҙың ялын күңелле үткәрергә тырышабыҙ, клубта оҫталыҡ дәрестәре күрһәтәбеҙ. Йәй көндәрендә балалар менән тәбиғәт ҡосағына экскурсияға йөрөйбөҙ.
Дөйөм алғанда, Тепляк ауылында ҡайһы йортҡа инһәң дә, матурлыҡ, муллыҡ күҙгә ташлана. Хеҙмәт һөйөүсән, тырыш халыҡ йәшәй бирелә. Йәнтөйәген йәшәртергә, матурларға, төҙөкләндерергә тырышалар. Шәйнуровтарға килгәндә, ауылдың әүҙем, булдыҡлы кешеләре улар. Теплякта ойошторолған бер генә сара ла уларҙан башҡа уҙмай. Шәйнуровтар кеүек уңған, маҡсатсан ғаиләләр ауылды йәшәтә лә инде.
Мәҙәниәт хеҙмәткәре көнө — ул музей, китапхана, клуб, сәнғәт мәктәптәре хеҙмәткәрҙәре генә түгел, ә күп һанлы мәҙәни саралар тамашасылары, үҙешмәкәр сәнғәттә ҡатнашыусылар, уҡыусылар һәм музейға йөрөүселәр байрамы ла. Нәҡ мәҙәниәт хеҙмәткәрҙәренең эше нәтижәһендә календарҙың ҡыҙыл көндәре һәм иҫтәлекле даталары халыҡ өсөн байрамға әйләнә. Айгөл һәм Илшат Шәйнуровтар ҙа ғәҙәти көндө байрамға әйләндереүселәр рәтендә.

Лира ЮРАСОВА.

Борай районы.