Ҡубияҙ мәсетендә Ураҙа ғәйете үтте

Бөгөн мосолман донъяһындағы иң ҙур байрамдарҙың береһе  - Ураҙа ғәйете. Ошо уңайҙан иртә менән ҡубияҙҙар  Ғәйет намаҙын уҡырға, баш-күҙ иҫәнлегенә, ил-көн тыныслығына, һалдаттарыбыҙҙың махсус хәрби операциянан иҫән-имен Еңеү менән ҡайтыуы өсөн хәйер-саҙаҡалар һалырға тип,  ауыл мәсетенә йыйыла.

“ Иртәнге һигеҙҙән мәсетебеҙҙә Ураҙа байрамы уңайынан сара башланды. Халыҡ күп  килде, биш йәштән 90 йәшкәсә  дин ҡәрҙәштәребеҙ Ғәйет намаҙына йыйылды.    Ата-әсәһенә эйәреп килгән балаларҙың, үҫмерҙәрҙең  булыуы айырыуса һөйөнөслө. Ситтән ҡайтыусы ауылдаштарыбыҙ ҙа күп булды.

 Байрам сараһын  мәсеттең имам-хатибы  Фәнис хәҙрәт Кашапов алып барҙы. Байрам вәғәзе һөйләгәндән һуң, мосолмандар менән бергә Ғәйет  намаҙы уҡыныҡ. Артабан мәҙрәсәгә инеп, унда ла намаҙҙар уҡылды.  

Ауыл биләмәһе хакимиәте һәм үҙемдең исемдән  барыһын да Ураҙа байрамы менән ҡотлап, изге теләктәремде еткерҙем.

Сара  мул табын артында дауам итте. Ике ҙур  ҡаҙанда бешерелгән былау менән һыйланып, тәмлекәстәр менән сәй эсеү менән тамамланды байрам. Артып ҡалған һый-хөрмәтте, былауҙы мәсеткә  килә алмағандарға  тараттылар. Бына шулай бик матур үтте  Ураҙа байрамы Ҡубияҙҙа”, - тип һөйләне Ҡубияҙ ауыл биләмәһе башлығы Ришат Мират улы Ғәбделхәев.

Афарин, ҡубияҙҙар!  Динебеҙ киләсәктә лә илебеҙҙә милләт-ара татыулыҡты нығытыуға, районыбыҙҙың һәм республикабыҙҙың сәскә атыуына булышлыҡ итһен.

Илебеҙҙә тыныслыҡ тантана итһен, махсус хәрби операцияла ҡатнашыусы ир-егеттәр иҫән-һау әйләнеп ҡайтһын,   халҡыбыҙ имен тормошта бәхетле йәшәһен!

Наилә Имаева.