+30 °С
Болотло
Милли проекттар
2 Июль 2021, 05:22
“ПОЛИЭФ” хеҙмәткәрҙәре Иҙәк буйын таҙартты
“Рәсәй һыуы” тип аталған экология акцияһы йыл һайын ойошторолоп килә. Ул Рәсәй Президенты Владимир Путиндың май указдары тарафынан билдәләнгән “Экология” милли проектына ярашлы уҙғарыла.
Ошо көндәрҙә республиканың иң эре сәнәғәт предприятиеларының береһе – Благовещен районы биләмәһендә урынлашҡан “Полиэф” акционерҙар йәмғиәте лә әлеге акцияға ҡушылды. Йәмғиәт хеҙмәткәрҙәре Иҙәк йылғаһы буйҙарын сүп-сарҙан таҙартты.
Бер нисә сәғәт эсендә генә коллектив тарафынан 35 ҡапсыҡ сүп-сар йыйылған. Был хаҡта “ПОЛИЭФ”тың экология бүлеге начальнигы Анна Рогозина хәбәр итте.
- Беҙ Төрөшлө ауылы янында ғына Иҙәк буйынан 200 килограмм самаһы сүп-сар йыйҙыҡ. Шулай уҡ Үрге Иҙәк ауылы янындағы ял өсөн бүленгән биләмә һәм “Өфө ыласыны” спорт үҙәгенә ҡарай юл, күпер буйҙары таҙарып ҡалды. Әгәр беҙҙең өлгөгә башҡа предприятиелар ҙа ҡушылһа, Башҡортостаныбыҙҙың йылға-күл буйҙары таҙарып, матурайып ҡалыр ине, - тип башҡарылған эштәр менән таныштырҙы предприятиеның экология бүлеге начальнигы.
Фото: mgazeta.com
Автор: Гөлдәр Яҡшығолова
