+30 °С
Болотло
Милли проекттар
1 Июль 2021, 05:56
Ауыл халҡы медицина ярҙамына мохтажлыҡ кисермәҫ
Һуңғы йылдарҙа ауыл ерҙәрендә медицина учреждениелары селтәрен үҫтереүгә ҙур иғтибар бирелә. “Һаулыҡ һаҡлау” милли проектының “Тәүге медик-санитар ярҙам күрһәтеү системаһын үҫтереү” федераль проектына ярашлы, 2019-2020 йылдарҙа республикала 139 фельдшер-акушерлыҡ пункты һәм дүрт ауыл табиплыҡ амбулаторияһы барлыҡҡа килде.
Мәҫәлән, 2019 йылда модуль конструкциялар ярҙамында 28 фельдшер - акушерлыҡ пункты һәм бер табиплыҡ амбулаторияһы төҙөлдө, Рәсәй Ауыл хужалығы министрлығы программаһы буйынса дүрт капиталь ФАП һалынды. 2020 йылда уларҙың һаны тағы ла артты - 94 фельдшер-акушерлыҡ пункты, өс табиплыҡ амбулаторияһы сафҡа индерелде. Был маҡсатҡа тотонолған средстволарҙың 62 проценты федераль бюджеттан бүленде. Бынан тыш, яңы медицина ҡорамалдары, йыһаздар һатып алынды.
Быйыл республикала йәнә 73 модулле ФАП төҙөү планлаштырыла, был маҡсатҡа федераль бюджет средстволары йүнәлтеләсәк.
Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.
”Һаулыҡ һаҡлау” милли проектының төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу.
Фото: Һаулыҡ һаҡлау министрлығы.
Автор: Дина Арсланова
