“Йәшел Башҡортостан” старт алды

24 апрелдә берҙәм экологик саралар көнө булды. Акцияның төп маҡсаты – республиканың ауыл-ҡалалары биләмәләрен таҙартыу, ипкә килтереү, йәшелләндереү.

Быйыл бар Рәсәйҙә өмәләр объекттарына “Уңайлы ҡала мөхите” федераль проекты нигеҙендә төҙөкләндерелгән йәмәғәт биләмәләре лә индерелгән. Акцияла студенттар, мәктәп уҡыусылары, ирекмәндәр, хеҙмәт коллективтары, власть органдары етәкселәре, хакимиәт башлыҡтары, дөйөм алғанда, йәшәгән урындарының торошона битараф булмаған һәр кем ҡатнашты.

Уңайлы ҡала мөхите булдырыуға 226 меңдән ашыу кеше, шул иҫәптән 35,9 мең студент, 9,7 мең ирекмән үҙ өлөшөн индергән. Эшкә 2148 берәмек махсус техника йәлеп ителгән, 2,5 мең тонна сүп-сар сығарылған, 348 туҡталка павильондары йыуылған, 314 сәскә газоны булдырылған, 506 һәйкәл һәм 140 ветеран ҡәберҙәре ипкә килтерелгән.

Ә “Йәшел Башҡортостан” акцияһында 116 мең кеше ҡатнашҡан, 22,5 мең төп ағас, 22,5 мең ҡыуаҡ һәм башҡа үрсетмәләр ултыртылған.