Бындай баҡсаға бәләкәстәр шатланып йөрөр!

Балалар баҡсаһын тантаналы асыу сараһында район хакимиәте башлығы Илдар Нафиҡов, мәғариф бүлеге, төҙөлөш эштәрен алып барған ойошма вәкилдәре һәм, әлбиттә, ошо йәмле йорттоң буласаҡ хужалары – бәләкәстәр ҡатнашты.

“Анир” йәмғиәте директоры Юнир Таһиров билдәләүенсә, барлыҡ уй-ниәттәрҙе тулыһынса тормошҡа ашырыу мөмкин булған – баҡса яҡты, йылы, заманса килеп сыҡҡан. Ул үҙенең сығышында мәғариф усағы хеҙмәткәрҙәре, балалар һәм ата-әсәләр төҙөүселәрҙең тырышлығын лайыҡлы баһалар, башҡарылған эштәр менән ҡәнәғәт ҡалыр, тип белдерҙе. Төҙөлөш ойошмаһы етәксеһе символик асҡысты тәрбиәсе Гүзәлиә Кәримоваға тапшырҙы.

Балалар баҡсаһы хеҙмәткәрҙәре һәм ата-әсәләр төҙөүселәргә ихлас рәхмәттәрен еткерҙе. Ысынлап та, бында бөтә уңайлыҡтар бар: иркен, яҡты уйын һәм йоҡо бүлмәләре, санузел, кейенеү-сисенеү урындары. Барлыҡ йыһаз өр-яңынан алынған. Балалар баҡсаһының белем биреү программаһында ҡаралғанса, мәктәпкәсә йәштәгеләрҙең интеллектуаль кимәлен үҫтереүгә, сәләмәтлектәрен нығытыуға, тәрбиәгә ҙур иғтибар биреләсәк, ти тәрбиәселәр.

Тантаналы сарала ҡатнашҡан район хакимиәте башлығы Илдар Нафиҡов: “Салауат ауылы халҡын балалар баҡсаһы асылыу менән ҡотлайым! Ошондай йәмле һәм заманса баҡсаға бәләкәстәр шатланып йөрөр тип ышанам”, - тип ихлас теләктәрен еткерҙе.

Ауылдарҙа яңы балалар баҡсалары төҙөү кеүек башланғыстар Рәсәй Президенты Владимир Путиндың май указдарында билдәләнгән “Демография” милли проекты ҡуйған бурыстарҙың үтәлешенә яуап бирә.

Фото: Әбйәлил районы хакимиәте.