Беренсе Бөтә Рәсәй йәмәғәтселек сәләмәтлеге буйынса диктант яҙыуҙа ҡатнашҡан төбәктәр араһында тәүге урындарҙың береһен яуланыҡ. 21 – 27 декабрҙә илдәге барлыҡ төбәктәрҙә онлайн режимда https://publichealth.ru платформаһында йәмәғәтселек сәләмәтлеге буйынса диктант үткәрелде.

Биш тема буйынса үҙ белемен тикшерергә теләгәндәр тестағы 50 һорауға яуап бирҙе. Һөҙөмтәлә унда ҡатнашҡан һәр кем йыйылған балл һанына бәйле I, II, III дәрәжәләге диплом йәки ҡатнашыу тураһындағы сертификат алды. Сарала 400 мең кеше ҡатнашҡан.

Төбәктәр араһында ҡатнашҡан кешеләр һаны буйынса Мәскәү, Башҡортостан Республикаһы һәм Белгород өлкәһе – лидерҙар. Диктантта ҡатнашҡандар “Сәләмәт йәшәү рәүеше” һәм “Хроник инфекция сирҙәре” темаларын яҡшы белгән.

Әйткәндәй, диктантты яҙғандарҙың 73 проценты – гүзәл зат вәкилдәре, 60 проценты – 35 йәште уҙғандар. Йәштәрҙең сәләмәт тормош алып барыу менән ҡыҙыҡһыныуы – ҡыуаныслы күренеш. Ә был – Рәсәй Президенты Владимир Путиндың май указдары нигеҙендә барлыҡҡа килгән “Һаулыҡ һаҡлау” милли проекты бурыстарының береһе.

Сараны Рәсәйҙең Һаулыҡ һаҡлау министрлығы менән “Эшлекле Рәсәй” дөйөм Рәсәй ижтимағи ойошмаһы ярҙамында “Медицина минең хаҡта” порталы һәм башҡалар ойошторған.

Фото: социаль селтәрҙән.