Һаулыҡ һаҡлау – алдынғы йүнәлеш

Рәсәйҙә Милли проекттарҙы тормошҡа ашырыу өсөн, Магистраль инфраструктураны яңыртыу һәм киңәйтеүҙең комплекслы планына ярашлы, ағымдағы йылдың һигеҙ айында федераль ҡаҙна сараларының 48,4 проценты тотонолған, аҡсаға әйләндергәндә был 1,059 триллион һум тигәнде аңлата (ҡаҙна имзаһы менән нығытылған 2,189 триллион һумлыҡ ассигнованиелар иҫәбенән).

Был хаҡта Рәсәйҙең Иҫәп палатаһы хәбәр иткән. Мәғлүм булыуынса, 1 сентябргә илдә алты милли проект буйынса эштәрҙе башҡарыуға тәғәйенләнгән сығымдар ҡаралғандың 50 проценттан ашыуын тәшкил иткән.

Лидер булып “Һаулыҡ һаҡлау” милли проекты тора: был йүнәлеш буйынса ҡаҙна ассигнованиеларының 62,5% сығымы тотонолған. Икенсе урында – “Бәләкәй һәм урта эшҡыуарлыҡ һәм шәхси эшҡыуарлыҡ башланғыстарына булышлыҡ итеү” (60,9%), артабан “Торлаҡ һәм ҡала мөхите” (55,5%), “Фән” (53,4), "Демография" (51,9%), "Мәҙәниәт" (50,1%) милли проекттары килә.

“Һаулыҡ һаҡлау” милли проектына килгәндә, Рәсәй Президенты Владимир Путиндың май указдарына ярашлы булдырылған был ғәмәлгә ярашлы, республикабыҙҙың медицина тармағы һуңғы йылдарҙа ҙур үҙгәрештәр кисерә, район һәм ҡалаларҙағы медицина учреждениеларының матди-техник базаһы заманға ярашлы яңыртыла.

Фото: moyaokruga.ru