Бәйгелә ҡатнашыусы ғаиләләргә уңыштар теләйбеҙ!

Башҡорт мәҙәниәтен, телен, халҡыбыҙҙың ғөрөф-ғәҙәттәрен һаҡлаған һәм үҫтергән өлгөлө ғаиләләрҙе табыу, дәртләндереү маҡсатында  ойошторолған был мәртәбле конкурста Асҡын районы данын  өс ғаилә яҡлай. “Ғаилә ижады” номинацияһында  — Асҡын ауылында йәшәүсе  йыр-моңға ғашиҡ  Рәзинә һәм Азат Фәйзуллиндар,

“Ғаилә кәсебе” номинацияһында — Сураш ауылында  икмәк бешереү  менән шөғөлләнеүсе Зөлфиә һәм Динар Ғайсиндар,

“Ғаилә традициялары һәм ҡиммәттәре” номинацияһында  Ҡашҡа ауылында йәшәүсе Флидә һәм Илшат Ғәлләмовтар ҡатнаша. 

“Өлгөлө башҡорт ғаиләһе-2023” асыҡ республика конкурсының зона этабы Тәтешле район Мәҙәниәт һарайында уҙасаҡ.  Унда һигеҙ райондан  — Асҡын, Бөрө, Борай, Ҡариҙел, Кушнаренко, Нуриман,  Мишкә, Тәтешле  райондарынан  вәкилдәр ҡатнаша.

Баһалама ағзаларына районыбыҙҙың бәйгесе ғаиләләре үҙҙәре хаҡында    өс номинацияла – “Ғаилә ижады”, “Ғаилә кәсебе” һәм “Ғаилә ҡиммәттәре”ндә видеороликтар ебәрҙе. Видеоматериалдарҙы баһалау һөҙөмтәләре буйынса  еңеүселәр  14 февралдә билдәләнәсәк. Төбәк  этабында еңгән ғаилә бәйгенең республика этабында ҡатнашасаҡ, ә республика этабы февраль аҙағына тиклем тамамланасаҡ. Еңеүселәрҙең исеме 1 мартта Башҡорт  ғаиләһе көнөндә үтәсәк Гала-концертта   иғлан ителәсәк.

Асыҡ конкурсты ойоштороусылар булып БР Мәҙәниәт министрлығы, «Бөтә донъя башҡорттары ҡоролтайы (конгресы)» Халыҡ-ара йәмәғәт берекмәләре союзы, БР Халыҡтар дуҫлығы йорто сығыш яһай.

Наилә Имаева.