Бөтә яңылыҡтар
Йәш хужабикәләргә!
12 Февраль 2023, 10:22

Үрсетмәләр ултыртыр мәл етте

Тупраҡты үҙебеҙ әҙерләп алайыҡ

Үрсетмәләр ултыртыр мәл етте
Үрсетмәләр ултыртыр мәл етте

Баҡсасыларҙың мәшәҡәтле лә, шул уҡ ваҡытта мауыҡтырғыс та мәле етте - үрсетмәләр ултыртыу. Бының өсөн иң беренсе сиратта яҡшы тупраҡ кәрәк.

Һуңғы арала күптәр кибеттән һатып алынғандың сифаты насар булыуға зарлана. Үҙегеҙ ҙә быға инанғанһығыҙҙыр. Һатыуҙағы күпселек тупраҡ торфтан тора, ул тиҙ генә ҡорой, уҡмаша. Йыш ҡына үҫентеләр бындай тупраҡта үҫә алмай. Шулай уҡ ҡайһы бер намыҫһыҙ етештереүселәр теплицаларҙан ҡулланылған, ташлай торған насар тупраҡты тултырып һата. Билдәле, унда зарарлы микроорганизмдар, ҡоротҡостар туп-тулы. Шуға ла үҫентеләр өсөн ерҙе үҙебеҙ әҙерләп алыу – яҡшы уңыштың нигеҙе.

Тупраҡты баҡсағыҙҙан, бигерәк тә борсаҡлылар йәки фасоль үҫкән түтәлдән алып, ағас аҫтынан, япраҡтар серетмәһе булған урындан алынғанына ҡушырға кәрәк (әлбиттә, быны көҙҙән әҙерләп ҡуйыу фарыз ине). Шуныһы мөһим: шыршы, ҡарағай, имән үҫкән урындан алмағыҙ, унда тупраҡ самаһыҙ әсе була. Артабан йылға ҡомо ҡушып, 1:1 иҫәбенән болғатырға ла бер стакан ағас көлө өҫтәргә кәрәк. Ул ерҙе зарарһыҙландыра, туҡландыра ла.

Шулай уҡ кибеттән алған универсаль, торфлы тупраҡҡа вермикулит йә перлит һәм микориза биопрепараты өҫтәһәң, шәп тупраҡ килеп сыға. Тик ерҙе алдан зарарһыҙландырырға онотмағыҙ.

Тупраҡта төрлө ҡорттарҙың күп булыуы билдәле. Уларҙан ҡотолоу өсөн әҙер ерегеҙҙе балконға сығарып туңдырып алырға кәрәк. Был ваҡытта күпселек ҡоротҡостар үлә, әммә барыһы ла түгел. Шуға ла индереп иретеп алып, яңынан һалҡынға сығарып туңдырыр кәрәк. Шулай ике-өс тапҡыр ҡабатлау зарур.

Икенсе ысул - духовкала йәки мейестә ҡыҙҙырып-яндырып алыу. Был осраҡта табаға биш сантиметр ҡалынлыҡта тупраҡты йәйеп һалып, 70-80 градус эҫелектәге мейескә ҡуйып тораһың. Өсөнсө ысул - парландырыу. Былай эшләһәң, ер дымланып, яҡшырып та китә. Тишекле сүмескә әҙер тупраҡты һалып, ҡайнап торған кәстрүл өҫтөндә тотаһың. Был ысулды орлоҡто сәсер алдынан ғына эшләү кәңәш ителә.

Шулай уҡ ҡоротҡостарға ҡаршы марганцовка иретмәһе ҡушылған һыу ҙа ярҙам итә, әммә ул сүп үләндәре орлоғон үлтермәй.

Бар ысулдар ҙа яҡшы, әммә шуныһы: зарарлылары менән бергә файҙалы микроорганизмдар ҙа үлә. Шуға ла зарарһыҙландырғандан һуң тупраҡты файҙалы матдәләр менән байытыу кәрәк.

Тәғәйен органик ашламалар һатыуҙа күп, шуларҙы ҡушыу - үрсетмәләрҙең көслө, ныҡ булыуының нигеҙе.

Фото: botanichka.ru

Автор:Миләүшә Сайтакова
https://bashgazet.ru/articles/0905/2023-02-11/rsetm-l-r-ultyrtyr-m-l-ette-3139373
Үрсетмәләр ултыртыр мәл етте
Үрсетмәләр ултыртыр мәл етте
Автор:
Читайте нас: