Петуния сәсеү серҙәре

Бер тәүлек алдан тупраҡты яҡшылап дымландырырға кәрәк. Был осракта орлоҡтарҙы тигеҙ итеп һалыу мөмкин буласаҡ. Орлоҡтарҙы сәсер алдынан ҡоро ҡом менән бутау ҙа хәйерле. Һыуҙы – пульверизаторҙан бөркөргә кәрәк. Иң яҡшыһы – тупраҡ өҫтөнә ҡар һалып, орлоҡто сәсеп сығыу. Һуңынан пакет йәки быяла менән ҡаплап, йылы, яҡты урынға ҡуялар. Орлоҡтар тигеҙ шытып сыҡһын өсөн +23-26 градус йылылыҡ кәрәк. Петуния майҙа сәскә ата башлаһын өсөн уны февраль башында сәсәләр. Үҫентегә 12-14 сәғәт яҡтылыҡ кәрәк, өҫтәмә яҡтыртмайса үҫтереп булмай. Ике аҙна һайын төрлө ашламалар менән туҡландырып тороу талап ителә. Үҫкәндә азотлы ашламаны үҙ итә, сәскәгә бөрөләнгәс, фосфор һәм калийға, тимергә мохтаж. 2 -3 япрағы күренгәс, айырым һауыттарға күсереп ултыртырға кәңәш ителә. Улай эшләргә теләмәһәгеҙ, үрсетмә сәскән ваҡытта уҡ орлоҡто айырым стакандарға сәсегеҙ.

Фото: ogorod.mirtesen.ru