- Теге йәки был ризыҡты әҙерләгәндә бер нисә тамсы ғына лимон һуты кәрәгә. Бының өсөн тотош лимонды киҫеп торорға түгел, ә энә менән тишеп кенә һығырға.
- Ит бешергәндә йыш ҡына артыҡ һурпа ҡала. Аптырамағыҙ, уны боҙ туңдырғыс һауытҡа һалып һаҡларға мөмкин. Кәрәк саҡта алаһың да, берәй аш-һыуға өҫтәйһең.
- Ризыҡ турағыс таҡта ҡайһы берҙә шыуғалаҡ була. Уның аҫтына еүеш сепрәк һалһағыҙ, был проблеманы оноторһоғоҙ.
- Тәмләткестәрҙең хуш еҫе нығыраҡ сыҡһын өсөн уларҙы турарҙан алда бер минуттай табала ҡыҙҙырып алырға кәрәк.
- Кәтлиттәр бер иш булһын өсөн уларҙы ябай стакан менән формалаштырырға мөмкин.
- Тоҡсай эсендә тоҡсайҙарығыҙ ятамы? Былай итһәң еңелерәк була: пакеттарҙы уңайлы итеп бәләкәй ҡумтаға урынлаштырығыҙ, кәрәк саҡта тартаһың да сығараһың.
- Шешәләге берәй эсемлекте тиҙ генә һыуытырға уйлаһағыҙ, уны еүеш сепрәккә төрөп, туңдырғысҡа һалығыҙ. Биш минут һәм һеҙҙең ҡулда – һалҡын эсемлек!
- Ҡоймаҡ ҡойоу өсөн массаны кәстрүлдә түгел, ә шешәлә әҙерләүе еңелерәк. Бөтә ингредиентты һалаһығыҙ ҙа, һелкетәһегеҙ. Табаға ҡойор өсөн дә айырым ҡалаҡ кәрәкмәй.
- Һарымһаҡты таҙартыу өсөн банка ҡулланығыҙ. Һалаһығыҙ ҙа, һелкетәһегеҙ.
- Боҙ урынына – туңдырылған емеш-еләк. Эҫе көндә берәүҙәр эсемлеккә боҙ һалып эсергә ярата. Ә боҙ һыуға әйләнеп, йыш ҡына уның тәмен боҙа. Боҙ кубиктары емештән эшләнһә, әйтәйек, һутығыҙ тағы ла тәмләнәсәк кенә.
- Аш һеркәһе (уксус) беҙгә төрлө саҡта ярҙам итә. Уның ярҙамында һыу торбаларын таҙартырға (бер стакан һеркәне раковинаға ҡойоп ағыҙырға ла, 30 минуттан йыуҙырырға), дөгөнө таралып тороусан итергә (ҡайнап сыҡҡас, бер балғалаҡ һеркә өҫтәргә), лаклы аяҡ кейемен ялтыратырға, һауалағы насар еҫте бөтөрөргә (һеркә һалынған һауытты бүлмәгә бер нисә сәғәткә ултыртып ҡуйырға) мөмкин.
А. АҠБУЛАТОВА әҙерләне.
https://ye102.ru/articles/mahsus/2022-09-03/layfhak-tar-y-sh-huzhabik-g-yar-amsy-2926682