Балтастар спортты үҙ итә

Районыбыҙ тормошонда спорт ҙур урын алып тора. Йәш спортсыларға бының өсөн барлыҡ шарттар ҙа булдырылған — район үҙәгендә “Йәшлек” физкультура-һауыҡтырыу комплексы, Балалар һәм үҫмерҙәр спорт мәктәбе, белем биреү усаҡтарында төрлө түңәрәктәр эшләй. Ә балалар, үҙ сиратында, төрлө дәрәжәләге ярыштарҙа ҡатнашып, уңыштарға ирешә.
Күптән түгел генә Борайҙа 2011-2012 йылғы үҫмерҙәр араһында мини-футбол буйынса турнир уҙҙы. Ҡыҙыу һәм көсөргәнешле ярышта Борай, Иҫке Балтас, Саҡмағош райондары һәм Яңауыл ҡалаһынан һигеҙ команда ҡатнашты. Уйындар төрлө алымдарға һәм киҫкен һөжүмдәргә бай булды. Йәш спортсылар футбол “яланында” үҙҙәренең юғары оҫталыҡтарын һәм еңеүгә ынтылыштарын күрһәтте. Спорт дәрте, һәр команданың чемпион титулы өсөн көрәшергә әҙер булыуы уйын башынан уҡ һиҙелә ине. Тамашасылар ярыштарҙың һәр минуты менән һоҡланып, һәр голды алҡыштарға күмде. Ҡыҙыу уйын һөҙөмтәләре буйынса “Йәшлек” физкультура-һауыҡтырыу комплексының өлкән командаһы лайыҡлы өсөнсө урынды яуланы. Еңеүсе һәм призер командалар миҙалдар һәм Почет грамоталары менән бүләкләнде. Шулай уҡ Балтастан Нурлан Фәтхуллин турнирҙың иң яҡшы уйынсыһы тип танылды.
Әлеге ярыштарҙан һуң бер нисә көндән Өфөлә футбол буйынса баш ҡала асыҡ беренселеге уҙҙы. Ярыштарҙа Өфө, Стәрлетамаҡ, Межгорье ҡалаларынан һигеҙ команда ҡатнашты. Бында ла Арсен Латыпов тәрбиәләнеүселәре призлы 3-сө урын яуланы. Ә Айнур Нурисламов команданың иң яҡшы уйынсыһы тип танылды.
— Беҙҙең спорт төрөндә иң мөһиме — даими рәүештә күнекмәләр үткәреү һәм ярыштарҙа ҡатнашыу. Улар бер-береһе менән үрелеп барырға тейеш. Шунда ғына яҡшы нәтижәгә ирешергә мөмкин. Шуға ла форсат сыҡҡанда ярыштарҙа ҡатнашырға тырышабыҙ. Шулай уҡ үҙебеҙҙә лә турнирҙар үткәрәбеҙ. ГТО хәрәкәтенән дә ҡалышмайбыҙ — тәрбиәләнеүселәребеҙҙең барыһы ла нормативтарҙы уңышлы тапшырҙы, — ти Арсен Рөстәм улы.
Армспорт буйынса ла ярыштарҙа балтастар уңыштары менән даими һөйөндөрөп тора. Ошо көндәрҙә армрестлинг буйынса XXIII чемпионат һәм Башҡортостан Республикаһы беренселеге үтте. Был мөһим ярыштарҙа Балтас районынан Балалар һәм үҫмерҙәр спорт мәктәбе тәрбиәләнеүселәре лә ҡатнашып, юғары нәтижәләргә иреште. Үҙ оҫталыҡтарын күрһәтеп, Илмар Әхәтов, Асҡар Сәрүәртдинов, Айгөл Хәбибуллина һәм Ләйсән Сәфетдинова — 1-се, Регина Саҙрыева, Данил Садыҡов, Камила Дәүләтшина, Диана Хәмәтова — 2-се, шулай уҡ Диана Хәмәтова һәм Камила Дәүләтшина, Динар Хижәпов, Данил Ғилмуллин 3-сө урынға лайыҡ булды. Өлкәндәр араһында Илдар Сәхипов 1-се урын яуланы. Тимур Әмирйәнов 2-се урынға сыҡты.
Йәш волейболсыларҙың да уңыштары бихисап. Балтастар Юғары Тәтешле ауылында үткән волейбол буйынса асыҡ беренселектә лә һынатманы. Бирелә Айрат Садыҡов етәкселегендәге команда 2-се урын алды.
Район тормошонда шахмат уйыны ла ҙур урын алып тора. Ошо көндәрҙә генә шахмат спорты ветераны Фәнзәүи Миңләхмәтовтың 75 йәшлек юбилейы уңайынан ирҙәр араһында шахмат турниры уҙҙы. “Ход конем” шахмат клубында ошо спорт төрөн һөйөүселәр уйындың төрлө һәм еңел түгеллеген күрһәтте. Әлбиттә, бөтәһе лә еңеүсе була алмай. Был юлы беренселекте Айнур Айдарбәков яуланы. 2-се урынға — Фәнзәүи Миңләхмәтов, 3-сө урынға Альберт Шәйхлисламов һәм Фәнзәл Синәтуллин сыҡты. Еңеүселәргә һәм призерҙарға грамоталар һәм аҡсалата бүләктәр тапшырылды.
Райондың үҙендә лә төрлө ярыштар үтеп тора. Әле ҡасан ғына район үҙәгендә 2011-2012 йылғы уҡыусылар араһында XXVI спартакиада иҫәбенә “Ҡыҙғылт һары туп” ярыштары гөрләне.
Спорт мәктәп уҡыусылары тормошонда һәр ваҡыт мөһим урын алып тора. Ә даими рәүештә үткәрелеп торған төрлө бәйгеләр уларға үҙҙәренең оҫталыҡтарын күрһәтергә, шулай уҡ ярыш рухын тойорға мөмкинлек бирә.
Ярыш көнөндә уйындарҙы ойоштороу ҙа маҡтауға лайыҡ. Балалар һәм үҫмерҙәр спорт мәктәбе хеҙмәткәрҙәре тарафынан алдан ғаризалар биреү тәртибенән алып бүләкләү тантанаһына тиклем яҡшылап уйланылған. Судья эше лә дөрөҫ алып барылды, был, үҙ сиратында, йәш спортсыларға бар иғтибарҙы уйынға ғына йүнәлтергә һәм иң яҡшыларҙы ғәҙел билдәләргә мөмкинлек бирҙе.
Барлыҡ уҡыусылар ҙа йәш булыуҙарына ҡарамаҫтан, ярышҡа яҡшы әҙерлектә килгән һәм командала эшләй белеүен, оҫталыҡтарын юғары дәрәжәлә күрһәтте. Көн дауамына тигәндәй һуҙылған ярыштар нәтижәләре буйынса малайҙар араһында Иҫке Балтас 2-се урта мәктәбе — 1-се, Иҫке Балтас 1-се урта мәктәбе — 2-се һәм Түбән Һикеяҙ урта мәктәбе командаһы 3-сө урын яуланы.
Ә ҡыҙҙар командалары араһында уйын нәтижәһе аҙаҡҡа ҡәҙәр билдәһеҙ булды. Береһенең дә еңелгеһе килмәне. Әммә һәр ярышта еңеүсе һәм призерҙар була. Бирелә беренселек — Иҫке Балтас 2-се урта мәктәбе командаһында. Иҫке Балтас 1-се урта мәктәбе — 2-се, Юғары Ҡарыш урта мәктәбе командаһы 3-сө урынға сыҡты. Еңеүселәргә һәм призерҙарға грамоталар һәм иҫтәлекле бүләктәр тапшырылды.

Фирғәт Нәбиуллин.

Балтас районы.