Финалға сыҡҡан команда составында - беҙҙең Тимур Сафин!

XXXII йәйге Олимпия уйындарында ҡатнашҡан спортсыларыбыҙ араһында фехтование буйынса 28 йәшлек Тимур Сафин бар.

Ул – Өфөләге Олимпия резервындағы 19-сы балалар һәм үҫмерҙәр спорт мәктәбе һәм спорт профилле 5-се мәктәп-интернат тәрбиәләнеүсеһе. 2014 йылда Башҡорт физик культура институтын тамамлаған. Тимур – өс тапҡыр Европа чемпионы, донъя, Европа чемпионаттары һәм Европа уйындары призеры. 2016 йылда Рио-де-Жанейрола үткәрелгән рапира буйынса команда ярыштарында – алтын, шәхси ярыштарҙа бронза миҙал яулаған. Катарҙа уҙғарылған һайлау этаптарында ҡатнашыу мөмкинлеге булмаһа ла, Токиолағы уйындарға Рәсәй йыйылма командаһы составында өҫтәмә һайлауҙа юллама алыу бәхете тейгән.

Әле ҡыуаныслы яңылыҡ билдәле булды: Тимур Сафин Рәсәйҙең фехтование буйынса ир-егеттәр йыйылма командаһы составында финалға сыҡты! Илебеҙ спортсыларына, яҡташыбыҙға уңыштар теләйбеҙ. Өҫтәүенә, ул йәйге Олимпиада уйындарын асыу тантанаһында ла ҡатнашҡайны. Был - Башҡортостаныбыҙ өсөн ҙур ғорурлыҡ!

Фото: республиканың Спорт министрлығы.