Ауыл халҡына ҙур бүләк

Яңы табип амбулаторияһы “Һаулыҡ һаҡлау” милли проектының “Медицинаның башланғыс звеноһын модернизациялау” программаһы сиктәрендә тормошҡа ашырылды. 

Бирелә табип-терапевт, табип-педиатр, фельдшер ҡабул итеү һәм прививка яһау, процедуралар кабинеттары бар. Шулай уҡ персонал һәм медицина препараттарын һаҡлау өсөн бүлмә, стоматология кабинеты ла ҡаралған.  Хатта фильтрбокс та бар. Ҡыҫҡаһы, халыҡ өсөн барлыҡ уңайлыҡтар ҙа булдырылған.

Яңы амбулаторияны асыу тантанаһында район хакимиәте башлығы Илгиз Субушев, Башҡортостан Республикаһы Һаулыҡ һаҡлау министрлығы вәкиле Булат Ғарифуллин, үҙәк район дауаханаһы баш табибы Салауат Ғилметдинов, Түбән Ҡарыш ауыл биләмәһе башлығы Ильяс Шәймөхәмәтов ҡатнашты.

Ҡунаҡтар тантанала сығыш яһап, урындағы халыҡты әлеге ҙур ваҡиға менән ҡотланы һәм яңы объектты төҙөүгә һәм матурлауға үҙ өлөшөн индергәндәргә рәхмәт һүҙҙәрен еткерҙе.

• Бөгөн район һәм ауыл өсөн ҡыуаныслы ваҡиға — барлыҡ уңайлыҡтары булған табип амбулаторияһын асабыҙ. Был ауыл халҡына Яңы йылға ҙур бүләк, тиһәк тә була. Кешеләрҙең ауырып түгел, ә профилактика өсөн генә бында килеүен теләйем, — тине Илгиз Әхүәс улы барыһын да тәбрикләп.

Һаулыҡ һаҡлау министрлығы вәкиле Булат Ғарифуллин үҙ сығышында яңы амбулатория асылыуы халыҡтың сәләмәтлеген һаҡлауға, нығытыуға файҙалы йоғонто яһаясағына ышанысын белдерҙе.

Гөлшат Тәҡиуллина Түбән Ҡарыш ауылы халҡына бына инде 24 йылдан артыҡ медицина хеҙмәте күрһәтә. Сарала сығыш яһап:

• Бындай ҙур ваҡиғаға барыбыҙ ҙа шат. Беҙ был табип амбулаторияһын оҙаҡ көттөк. Бирелә халыҡ өсөн барлыҡ уңайлы шарттар ҙа бар: йылы, яҡты, иркен. Бина барлыҡ стандарттарға һәм нормаларға тулыһынса тура килә. Ул Юғары һәм Түбән Ҡарыш, Анновка ауылдарынан 800-ләп кешене хеҙмәтләндерәсәк. Уларҙың 71-е — бала. 90 йәште уҙған дүрт кеше бар, — тине Гөлшат Ғәзнәүи ҡыҙы.

Ҡарыш ауылы халҡы исеменән беренсел ветерандар ойошмаһы рәйесе Ғиззәт Суфияров та барыһына ла рәхмәт һүҙҙәрен еткерҙе.

• Бындай заманса бина беҙгә бик кәрәк ине. Ауылда күбеһе ололар. Шуға күрә, бирегә магазинға йөрөгән кеүек, йыш йөрөйбеҙ. Дарыуҙар тураһында һорашабыҙ, укол ҡаҙатабыҙ, ябай кәңәш артынан да киләбеҙ. Хәҙер яңы бинала барлыҡ шарттар ҙа бар. Республика, район етәкселегенә ҡарыштар исеменән оло рәхмәтемде еткерәм, — тине Ғиззәт Фәтих улы.

Йола буйынса ҡыҙыл таҫманы киҫкәндән һуң ҡунаҡтар яңы амбулатория кабинеттары менән танышты. Бирелә халыҡҡа сифатлы һәм тиҙ ярҙам  күрһәтеү өсөн барлыҡ шарттар ҙа тыуҙырылған. Кәрәкле медицина ҡорамалдары, инструменттар, мебель менән йыһазландырылған.

Түбән Ҡарыш ауылында асылған яңы медицина учреждениеһы ауылды үҫтереүгә, йәштәрҙең бирегә ҡайтыуына ҙур этәргес булыр, тип ышанабыҙ.

Фирғәт Нәбиуллин.

Балтас районы.