"Беҙ һәйкәлде юҡ итергә уйламайбыҙ!"

Башҡортостан Башлығының тура бәйләнеше барышында Салауат Юлаев һәйкәлен реконструкциялауға бәйле һорауҙың булыуы тәбиғи ине. Уны журналист Рита Өмөтбаева бирҙе.

Радий Хәбиров әйтеүенсә, һәйкәлде төҙөкләндереү йыл ярым ваҡытты аласаҡ. Эштәр 2025 йылда башланасаҡ.

“Беҙ һәйкәлде юҡ итергә уйламайбыҙ. Киләһе быуындар һәм республика өсөн һәйкәлде һаҡлап ҡалыу теләге генә бар, – тине республика етәксеһе. – Беҙҙең алда бик ауыр эш тора. Һәйкәлдең торошо бик борсой. Конструкцияны коррозия ныҡ ашаған – ул аттың артҡы аяғын һәм эске каркасын нығыраҡ зарарлаған. Был һәйкәлдең бөтөнләй юҡҡа сығыуы менән янай. Постаменттың үҙенә лә һорауҙар бар. Шуға күрә уны бөтөнләй юғалтмаҫ өсөн беҙгә эште башларға тура килде”.

Төҙөкләндерә башлау өсөн 2025 йылда республика ҡаҙнаһынан аҡса бүленә, тип билдәләне Радий Хәбиров. Яҡынса иҫәпләүҙәр буйынса, реставрация йыл ярым самаһы ваҡытты аласаҡ. Ул шулай уҡ һәйкәлде һүтеүгә ҡағылышлы фекерен белдерҙе, был - эксперт комиссияһының талабы.

“Бөгөн генә реконструкциялау проекты дәүләт федераль эксперт комиссияһының ыңғай һығымтаһын алды. Эштәрҙе башлау өсөн документтарыбыҙ бар. Уға тиклем нисек быны эшләргә кәрәклеген бергәләп тикшерәбеҙ әле. Бөтәһе лә аңлаһын өсөн, реконструкция хатта һәйкәлдең ҡайһы бер өлөштәрен алмаштырыуҙы күҙ уңында тота”, - тип аңлатты республика Башлығы.

Фото: "Башинформ". 

https://bashgazet.ru/articles/s-y-s-t-m-kho-u/2024-12-03/be-yk-lde-yu-iterg-uylamayby-4036284?utm_source=vk&utm_medium=social&utm_campaign=104965500