Туймазы районында дүрт ауылда ҡош-ҡортто йыйып яндырғандар

5 октябрҙә Рәсәй МЧС-ының БР буйынса идаралығында Туймазы районының Бишҡурай ауылында ҡош киҙеүе асыҡланыуы тураһында хәбәр ҡабул итәләр. Район башлығы ҡарары менән бында 6 октябрҙә ғәҙәттән тыш хәл режимы индерелгән.

Карантин зонаһына ингән-сыҡҡан урындарҙа транспортты тикшереү һәм санитар эшкәртеү өсөн көсәйтелгән санитар постары ҡуйылған. Хәүефле урындағы Бишҡурай, Ярмунса, Булат һәм Николаевка ауылдарында ихата һайын йөрөп ҡош-ҡорттарҙы йыйыу ойошторолған һәм МЧС хеҙмәткәрҙәре күҙәтеүендә яндырып юҡ ителгән. Кетәк-һарайҙарға, ихаталарға өс ҡат дезинфекция үткәреләсәк, ем-маҙар утилләштерелгән. Һәр хужалыҡта йәшәүселәр «Совигрипп» менән вакциналанған.

Әле район хакимиәте тарафынан халыҡҡа килтерелгән зыянды ҡаплау тураһында хәл ителә.

8 октябрҙә ЧС режимы айырым ҡарар сыҡҡанға тиклем юғары әҙерлек режимына күсерелгән. Ауылдар тирәһендәге постар тәүлек әйләнәһенә эшләй.

Ситуацияны Рәсәй МЧС-ының БР буйынса идаралығы даими контролдә тота.