Антиесемдәр прививка яһауға ҡаршылыҡ була алмай

“Антиесемдәр булыуы коронавирустан вакцинация яһатыу өсөн ҡаршылыҡ була алмай, - тип хәбәр итте һаулыҡ һаҡлау министры Максим Забелин. - Шуға ярашлы, антиесемдәрҙең ниндәй кимәлдә булыуы медицина кире ҡағыуы өсөн нигеҙ түгел”.

Ҡайһы саҡта вакцинация яһатмау өсөн нигеҙ бар? Һаулыҡ һаҡлау министрлығының яуаптарына күҙ һалайыҡ:

- препарат компоненттарына һиҙгерлек ныҡ булғанда;

- аллергия сирҙәренең ауыр формаларында;

- бынан алда индергән вакцинаға реакция йәки вакцинанан һуң өҙлөгөүҙәр булғанда;

- киҫкен йоғошло һәм йоғошло булмаған сирҙәр, киҫкенләшеү осорондағы хроник ауырыуҙар барышында;

- иммунодефицит;

- ҡан ауырыуҙары һәм яман шештәр;

- йөклөлөк һәм күкрәк һөтө менән туҡландырыу осоро;

- 18 йәшкә тиклемге балалар.

Иҫегеҙгә төшөрәбеҙ, элегерәк коронавирустан һуң антиесемдәр барлыҡҡа килгән пациенттарға алты айҙан һуң прививка яһатырға тәҡдим ителгәйне. Бөгөн Рәсәйҙә эпидемиологик хәл насарланыу сәбәпле, Рәсәй Һаулыҡ һаҡлау министрлығы антиесемдәрҙең булыу-булмауына ҡарамаҫтан, бөтә кешегә лә вакцина яһатырға тәҡдим итә.

Фото: ”Башинформ”.