Мин киткәнгә илап ҡайғырмағыҙ, Батыр ирҙәр тыуыр тағы ла

Ул 1754 йылдың 16 июнендә Ырымбур губернаһы Өфө провинцияһы Себер даруғаһы Шайтан-Көҙәй улусының (хәҙерге Башҡортостан Республикаһының Салауат районы) Тәкәй ауылында тыуған. Атаһы улы Салауатҡа яҡшы белем һәм тәрбиә бирә, ул төрки һәм рус телдәрендә уҡырға һәм яҙырға өйрәнгән. Салауат Юлаевтың әсәһе тураһында документаль мәғлүмәттәр һаҡланмаған, уның Аҙнабикә исемле икәне генә билдәле. Салауат 14 йәшлек үҫмер сағында уҡ айыу менән көрәшеп, ябай бысаҡ ярҙамында ғына уны еңеп сыға алған. Егет шулай уҡ йырсы-импровизатор һәм ҡурайсы ла булған. 1773 - 1775 йылдарҙағы Крәҫтиәндәр һуғышы етәкселәренең береһе. Салауат атаһы Юлай Аҙналин менән бергә 25 йыл ғүмерен тотҡонлоҡта үткәреп, 46 йәшендә генә вафат була.

Салауат Юлаев

Минең тыуған ҡырҙарым,

Балдай татлы һыуҙарым,

Яландарым, урманым,

Күккә ашҡан Уралым, —

Минең изге төйәгем,

Һеҙҙе һөйә йөрәгем.

Күгәреп күккә үрелгән

Ҡарлы башын Уралдың,

Күҙҙең яуын алырҙай

Матурлығын ҡырҙарҙың

Мәңге маҡтар инем мин,

Мәңге данлар инем мин.

Тыуған-үҫкән илемдән

Яҙмышым йыраҡ ташлаһа,

Һеҙҙе һағынып өлгөрәм,

Төшөмдә һеҙҙе гел күрәм,

Минең тыуған ҡырҙарым,

Балдай татлы һыуҙарым,

Яландарым, урманым,

Һөйгән һылыу Уралым!

Тыуған яҡтан ел иҫһә,

Ул миңә хәбәр килтерә;

Тыуған-үҫкән еремдән,

Өҙөлөп һөйгән илемдән, —

Минең тыуған ҡырҙарҙан,

Балдай татлы һыуҙарҙан,

Яландарҙан, урмандан,

Күккә ашҡан Уралдан

Миңә хәбәр килтерә.

Фото: resbash.ru

https://yanshishma.rbsmi.ru/articles/i-t-lekle-k-nd-r-/Min-kitk-ng-ilap-ay-irma-i--Batir-ir-r-tiuir-ta-i-la-828317/?utm_source=vk&utm_medium=social&utm_campaign=45440006