+22 °С
Ясно
Новости
5 Ноября 2020, 10:30
Оло хөрмәткә лайыҡ һоҡланғыс пар
Иҫке Ҡара ауылында ғүмер иткән Мөмкинат Мәүлетдин ҡыҙы менән Заһит Ғәлинур улы Талиповтар күптән түгел үҙҙәренең алтын туйҙарын билдәләне.
Алтын туй - йылдар һынауына бирешмәгән оло мөхәббәттең сағылышы ул. Ярты быуат ғүмер бергә йәшәү өсөн кешеләргә күпме сабырлыҡ, түҙемлек, өмөт-ышаныс, аҡыл кәрәк. Был күркәм сифаттарҙың барыһы ла 50 йыл бер-береһенә терәк-таяныс булып ғүмер итеп, бөгөн бәхетле ҡартлыҡ кисереүсе Талиповтарға хас. Мөмкинат апай менән Заһит ағайҙы хаҡлы рәүештә ауылдың хөрмәтле ағинәйе менән аҡһаҡалы, тип атарға мөмкин. Бер бөтөн булып, матур ғүмер иткән был татыу пар бөгөн 10 ғына йорт ҡалған бәләкәй ауылға йәм өҫтәй, уның ҡотон арттыра. Оло йәшкә етеүҙәренә ҡарамаҫтан, йәштәрҙән бер ҙә ҡалышмайҙар, мал аҫрап, матур, етеш донъя көтәләр, һәр кемгә алсаҡ, асыҡ йөҙлөләр.
Талиповтарҙы алтын туйҙары менән ҡотларға Иҫке Ҡаҙансы ауыл биләмәһе башлығы Илдар Денисламов, ауыл Советы белгесе Зинира Денисламова, Яңы Ҡара клубы методисы Гөлнара Шәйхинурова килә. Илдар Фәрит улы юбилярҙарҙы тормоштарындағы иҫтәлекле һәм шатлыҡлы ваҡиға менән ҡотлап, бәхетле парға республика Башлығының ҡотлау хатын һәм иҫтәлекле бүләген тапшыра. Сығыш яһаусы һәр кем Мөмкинат апай менән Заһит ағайҙың изге күңелле, уңған, матурлыҡҡа ғашиҡ пар булыуын, дүрт балаһына ла матур тәрбиә биреп, бөгөн уларҙың ҡәҙер-хөрмәтенә төрөнөп, ейән-ейәнсәрҙәр һөйөп йәшәүен билдәләй.
- Мөмкинат апай менән Заһит ағайға һоҡланмау мөмкин түгел. Оло йәштә булһалар ҙа улар бөгөн дә гөрләтеп донъя көтәләр. Бар эшкә лә оҫта, матурлыҡҡа ғашиҡ Мөмкинат апай сәскәләр үҫтерергә ярата. Йәйҙәрен уның ихатаһы күҙ яуын алырлыҡ гөлбаҡсаға әйләнә. Мөмкинат апай ҡул эше оҫтаһы ла. Береһенән-береһе матурыраҡ, сағыуыраҡ итеп сиккән әйберҙәренә кемдәр генә хайран ҡалманы икән!? Күңел йылыһын һалған ҡул эштәрен ул яҡындарына ихлас бүләк итә. Уңған хужабикәнең өҫтәленән һый-хөрмәте лә өҙөлмәй, кем генә инһә лә ул яҡты йөҙ менән ҡаршылап, тәмлекәстәре менән сәй эсереп, ашатып сығара. Мөмкинат апай күп йылдар инде биш ваҡыт намаҙын ҡалдырмай уҡып, динебеҙ ҡушҡанды үтәп йәшәй. Заһит ағай ҙа шул тиклем хәстәрлекле хужа: бөтә ерҙә бөхтәлек, төҙөклөк, тәртип. Ир ҡанаты – ат була, тип нәҡ уның тураһында әйтелгән һымаҡ. Заһит ағай ғүмере буйы һәм бөгөн дә ат ҡарай, - тип юбилярҙарҙы маҡтап, уларға һоҡланыуын белдерҙе Гөлнара апай.
Әйе, лайыҡлы ғүмер юлы үткән Талиповтар. Заһит ағай Мөмкинат апай менән Кушнаренко ауыл хужалығы техникумында уҡығанда таныша. Борай районы һылыуы Мөмкинат апай ҙа агроном белгеслеге буйынса белем алған була. Уҡыуҙарын тамамлап, йәштәр Иҫке Ҡара ауылына “Дружба” совхозына эшкә урынлашып, бар ғүмерен ошонда төрлө вазифаларҙа – агроном да, бригадир ҙа, идарасы ла булып намыҫлы хеҙмәт итеп, хаҡлы ялға сыға.
Наилә Имаева.
