Бәлки, берәйһегеҙҙең туғанылыр?

Ошо фотоһүрәттәге кеше берәйһен хәтерләтмәйме? Рәсемдә – һуғыш йылдарында немецтарға пленға эләккән Башҡортостан кешеһе. Баҡһаң, уны Францияның үҙенән эҙләйҙәр икән.

Фотоһүрәт буйынса пленға төшкән һалдаттарҙың шәхесен Парижда йәшәгән Рәсәй тарихсыһы, Ширҡиәт телдәре һәм цивилизациялар милли институты уҡытыусыһы Георгий Шепелев асыҡларға тырыша. Был фотоларҙы вермахт һалдаттары һәм офицерҙары төшөргән.

Яңылыҡты http://www.portailrusse.fr/ порталы хәбәр итә. Уның фондында барлығы 20 совет хәрби әсире фотоһүрәте бар. Һәр береһенең артында немец телендә һәр ҡайһыһының милләте яҙылған. Был һүрәт артында “Өфөнән башҡорт” тиелгән яҙма бар. Һалдат беренсе донъя һуғышы ваҡытындағы француз һалдаты шинелен кейгән. Шепелев фекеренсә, бәлки ул фашистар баҫып алған Франциялағы келәттәрҙән алынғандыр.

“Был фотоһүрәттәр ниндәй маҡсат менән эшләнгәндер, әйтеүе ауыр. Этнографик “коллекция”? Бәлки, немецтарҙың “көнсығыш халыҡтарын” еңеүен күрһәтергә теләүеме? Әсирҙәр ҡиәфәтенә ҡараһаң, улар ҡырынған һәм сәстәре алынған, йыуынған, ас кешегә оҡшамаған. Бәлки, һүрәттәр пропаганда маҡсатында эшләнгәндер. Тик бөтәһенең дә йөҙө етди, бер кем дә йылмаймай. Улар әсирлектәге “бәхетле” тормошто сағылдырмай”, – тип фекер йөрөтә тарихсы.

Георгий Шепелев берәйһе фото аша үҙенең туғанын таныр һәм уның исемен асыҡлап булыр тип ышана. Тарихсы менән chepelev@hotmail.com. электрон почтаһы аша бәйләнешкә инергә мөмкин.

Фото: http://www.portailrusse.fr/