+30 °С
Болотло
Новости
13 Март 2020, 18:30
Семинар-практикум үтте
Республика “Шәжәрә байрамы”на һәм VI Бөтә донъя фольклориадаһына әҙерлек сиктәрендә бөгөн район хакимиәтендә мәҙәниәт хеҙмәткәрҙәре өсөн семинар-практикум үтте.
Сарала район хакимиәте башлығының беренсе урынбаҫары Илнур Иғдиев, республика Халыҡ ижады үҙәгенең фольклор буйынса баш белгесе Гөлгөнә Баймырҙина, Башҡортостан Республикаһы Үҙәк дәүләт тарих архивының документтарҙы баҫтырыу һәм ҡулланыу бүлеге начальнигы Зөлфәр Ғәтиәтуллин, Башҡортостан Республикаһы Стратегик тикшеренеүҙәр институтының Социологик һәм мәҙәни анализ үҙәге етәксеһе, тарих фәндәре кандидаты Юлдаш Йосопов, Ш.Бабич исемендәге йәштәр премияһы лауреаты, ”Башҡортостан” гәзитенең әҙәбиәт һәм мәҙәниәт бүлеге мөдире, шағирә Лариса Абдуллина ҡатнашты. Улар үҙҙәренең эшмәкәрлеге буйынса сығыш яһап, фәһемле кәңәштәрен бирҙе.
“Боронғо ғөрөф-ғәҙәттәребеҙ, халҡыбыҙҙың йолалары, шәжәрәбеҙ менән бер рәттән милли аш-һыу нескәлектәрен, серҙәрен һаҡлаһаҡ, тергеҙһәк, үҙ тамырҙарыбыҙҙы белһәк кенә беҙ милләт булараҡ үҙ асылыбыҙҙы, йөҙөбөҙҙө һаҡлап ҡаласаҡбыҙ”, — тине баш ҡала ҡунаҡтары.
Семинарҙың практик өлөшөндә Гөлгөнә Баймырзина етәкселегендәге "Селтәр" студияһы оҫтабикәләре Фәнүзә Аллағолова менән Фәнисә Минғәлимова хәситә, ҡашмау, таҡыя тегеү буйынса оҫталыҡ дәресе үткәрҙе.
Быларҙың барыһы тураһында тулыраҡ район гәзиттәрендә уҡый алаһығыҙ.
Наилә Имаева.
