+30 °С
Болотло
Новости
4 Март 2020, 18:05
Ҡотлайбыҙ!
Солтанбәк ауылында йәшәүсе 8 бала әсәһе Фәридә Рәхимйәнова «Әсәлек даны» миҙалына лайыҡ булды.
Бөгөн,4 мартта, Башҡортостан Республикаһы Башлығы Радий Хәбиров күп балалы гүзәл заттарға “Әсәлек даны” миҙалын тапшыра. Радий Фәрит улы әсәләрҙе улар өсөн әһәмиәтле ваҡиға һәм яҡынлашып килгән Халыҡ-ара ҡатын-ҡыҙҙар көнө менән тәбрикләп, Волга буйы федераль округында күп балалы ғаиләләр һаны буйынса Башҡортостандың беренсе урында булыуын билдәләй.
- Республикабыҙҙа күп балалы 50 мең ғаилә йәшәй. Бөгөн тағы ла 50 әсәгә “Әсәлек даны” миҙалын ҡыуанып тапшырам. Һеҙҙең ғаиләләрегеҙҙә дөйөм алғанда 251 бала тәрбиәләнә. Балаларыбыҙ сәләмәт, аҡыллы һәм сифатлы белем алып үҫһен һәм киләсәктә үҙҙәренә оҡшаған һөнәр алып, ныҡлы ғаилә ҡорһон өсөн беҙ артабан да ауылдарҙы һәм ҡалаларҙы төҙөкләндерәсәкбеҙ, яңы балалар баҡсалары һәм мәктәптәр, дауаханалар, мәҙәниәт усаҡтары, спорт майҙансыҡтары төҙөйәсәкбеҙ, - ти Радий Фәрит улы сығышында.
Тәбрикләнеүселәр араһында Солтанбәк ауылында йәшәүсе Фәридә Рәхимйәнова ла бар. Фәридә Камил ҡыҙы тормош иптәше Фәрзәүи Мөсәлләм улы менән 8 бала тәрбиәләй. Үҙҙәренең биш балаһы янына тәрбиәгә тағы өс бала алып, уларға ата-әсә наҙы бирә. Был уңған ғаиләлә балалар үҙ-ара дуҫ-татыу булып, мәктәптә тырышып уҡып, һәләттәрен үҫтереп, спорт менән шөғөлләнеп үҫә. Бар эшкә лә оҫта Рәхимйәновтар бөтә уңайлыҡтары булған ҙур йорт төҙөп инә. Эшһөйәр, йүнсел ғаилә күпләп мал аҫрай, йәшелсә-емеш үҫтереп тә мул уңыш ала. Ғаилә башлығын - алтын ҡуллы балта оҫтаһы, ә хужабикәне аш-һыу оҫтаһы булараҡ та хөрмәт итәләр.
Мәктәптә лаборант булып эшләүсе Фәридә Камил ҡыҙын “Әсәлек даны” миҙалына лайыҡ булыуы менән ҡотлап, ғаилә именлеге, балалар ҡыуанысы теләйбеҙ.
Наилә Имаева.
Фотолар Башҡортостан Башлығы сайтынан алынды.
