Афарин, Гүзәл!

Сорғот ҡалаһында үткән гер спорты буйынса Рәсәй беренселегендә республика командаһы составында Асҡын герселәре Гүзәл Имаева (9-сы класс), Алмаз Шәнгәрәев (11-се класс), Илһөйәр Ғимранова (11-се класс) ла ҡатнаша. 12 февралдә башланған ярыштар төрлө йәш һәм ауырлыҡ категориялары буйынса бара. Бөгөнгө көн асҡындар өсөн бик уңышлы була. Гүзәл Имаева 16 килограмлы герҙе 207 тапҡыр күтәреп, 3-сө урынға лайыҡ була.

- Ярыштар бик көсөргәнешле бара. Бында бик көслө спортсылар килгән. Иртәгә һуңғы көндә Илһөйәр менән Алмаз үҙ ауырлыҡ категорияларында ҡатнашасаҡ. Уларға ла уңыштар теләйем, - тип бәйләнешкә сыҡты Башҡортостан командаһына тағы ла бер еңеү килтергән Гүзәл Имаева.

Асҡын спортсыларын Рәсәй беренселегенә Балалар-үҫмерҙәр спорт мәктәбе тренеры Айдар Наил улы Сабиров әҙерләп алып бара. Райондаштарыбыҙға һәм бөтә командаға уңыштар теләйбеҙ!

Наилә Имаева.