Валерий Меладзе, Джефф Монсон һәм Сергей Доренко төлкө бүректәр менән бүләкләнде

Хәтерегеҙгә төшөрәбеҙ, Башҡортостанда Башҡорт теле көнөнә ҡарата флешмоб ойошторолдо. Акцияны «Башинформ» агентлығының Директорҙар советы рәйесе Ростислав Мырҙағолов башлап ебәрҙе. Социаль селтәргә һалынған башҡортса видеороликтар #деньбашкязыка, #яратамбашкортостанды, #башкруто хэштегтары менән билдәләнде.

Валерий Меладзе республикала йәшәүселәрҙе башҡорт телендә байрам менән ҡотлап, шатлыҡ һәм уңыштар теләне. Танылған спортсы һәм Рәсәй сәйәсмәне Джефф Монсон Виктор Цойҙың «Перемен» йырының ҡушымтаһын башҡортса йырлап күрһәтте. Журналист Сергей Доренко сараларҙың береһендә башҡортса телмәр тотто.

Бүләкләү бөгөн уҙҙы. Флешмоб еңеүселәре башҡорт милли кейемдәре — еләндәр, төлкө бүректәр һәм «Бүреләр» төркөмөнән дисктар, «Өфө» футбол клубынан сувенирҙар, башҡортса открыткалар менән бүләкләнде. Флешмоб йомғаҡтары буйынса беренсе урынды башҡорт теле уҡытыусыһы Гөлназ Йосопова менән блогер Рәис Ғәбитов бүлеште.

Фото: Алексей Дербеко

ӨФӨ, 2018 йыл, 28 декабрь. /«Башинформ» мәғлүмәт агентлығы, Ләйлә Аралбаева/.

http://www.bashinform.ru/news/1257164-valeriy-meladze-dzhef-monson-i-sergey-dorenko-poluchili-v-poda...