Башҡортостан Рәсәй йыйылмаһы составында Бөтә донъя күсмә халыҡтар уйындарында өсөнсө урынды алды

Донъяның 74 иленән 1900 спортсы. Ҡырғыҙстанда Бөтә донъя күсмә халыҡтар уйындары тамамланды.Рәсәй йыйылма командаһы составында ярыштарҙа ҡатнашып, Башҡортостандан 36 вәкил өсөнсө урынды алды.

«Дөйөм команда иҫәбендә Ҡырғыҙ Республикаһы йыйылмаһы еңеү яуланы (100 миҙал — 40 алтын, 30 көмөш һәм 30 бронза). Таблицаның икенсе баҫҡысын 69 миҙал менән Ҡаҙағстан йыйылмаһы биләй — 16 алтын, 24 көмөш һәм 29 бронза. Рәсәй командаһы — өсөнсө урында. Беҙҙең йыйылмала 52 миҙал — 16 алтын, 11 көмөш һәм 25 бронза. Дүртенсе урында — Төркмәнстан (27 миҙал — 10 алтын, 5 көмөш, 12 бронза), бишенселә — 33 миҙал менән Үзбәкстан командаһы, шуларҙың — 7-һе алтын, 8-е көмөш, 18-е – бронза», — тип хәбәр иттеләр республика Йәштәр сәйәсәте һәм спорт министрлығының матбуғат хеҙмәтенән.

Башҡортостан спортсылары түбәндәге дисциплиналарҙа төрлө дәрәжәләге миҙалдар яуланы: Гуштини милли камарбанди (тажик милли билбау көрәше) көрәшендә Артур Зөлҡәрнәев — 80 килограмға тиклемге ауырлыҡ категорияһында «алтын», «бронза» — Рәзил Шабиевта (68 килограмға тиклем); төркмән көрәшендә «бронза» — Евгений Бикташевта (62 килограмға тиклем); ҡаҙаҡ көрәшендә «көмөш» — Дмитрий Баляновта; азербайжан көрәшендә өсөнсө урын Илфаҡ Ибәтуллинда; бөркөт менән һунар итеүҙә Гөлгөнә Баймырҙина икенсе урынды алды, ә төрөк көрәше буйынса ярыштарҙа Курмангазы Шаймуханов бронза миҙал яуланы.

http://www.bashinform.ru/news/1210270-bashkiriya-zanyala-trete-mesto-na-vsemirnykh-igrakh-kochevnikov/