Өфөлә Бөтә донъя СИОФФ конгресы уҙғарыла

Бөтә донъя CИОФФ конгресы йыл һайын СИОФФ ағзалары булып торған төрлө илдәрҙә уҙғарыла. Сараны Халыҡ-ара фольклор һәм традицион сәнғәт фестивалдәре ойошмалары советы, Рәсәй дәүләт халыҡ ижады йорто, Башҡортостан хөкүмәте, Башҡортостандың Конгресс-бюроһы ойоштора.

Конгресты уҙғарыу СИОФФ етәкселегенә һәм уның ағзаларына Башҡортостан менән танышырға һәм 2020 йылда Өфөлә Бөтә донъя фольклориадаһына йәлеп итеү күҙалланған инфраструктураны өлөшләтә һынап ҡарарға мөмкинлек бирә.

Бөтә донъя конгресы 11 көн дауам итә, уның эшендә 60 илдән — Азербайжан, Швейцария, Хорватия, Индонезия, Люксембург, Канада, Һиндостан, Финляндия, Коста-Рики, Франция, Япония, Румыния, Италия, АҠШ, Словения, Ҡытай, Венгрия, Германия, Македония, Испания, Камерун, Босния һәм Герцеговина, Мексика һәм башҡа дәүләттәрҙән СИОФФ-тың милли секциялары һәм башҡарма комитетының 200 вәкиле ҡатнаша.

Сара бер нисә майҙансыҡта: Башҡортостан Республикаһы Дәүләт Йыйылышы — Ҡоролтайҙа, Конгресс-холда, «Шератон» ҡунаҡханаһында уҙа.

Мәҙәни программа сиктәрендә ҡунаҡтар М.В. Нестеров исемендәге Башҡорт дәүләт художество музейына, Ф. Ғәскәров исемендәге дәүләт академия халыҡ бейеүҙәре ансамбле, Милли халыҡ ҡоралдары оркестры һәм «Арғымаҡ» этно-рок төркөмө концерттарына бара, тип хәбәр иттеләр Башҡортостан Республикаһы Конгресс-бюроһының матбуғат хеҙмәтендә.

http://www.bashinform.ru/