Бөгөн – Рәсәй Федерацияһының Дәүләт флагы көнө

Советтар Союзы тарҡалғас, 1991 йылдың 22 авгусында үткән РСФСР Юғары Советының ғәҙәттән тыш сессияһында дәүләт флагы тураһында ҡарар ҡабул ителә. Шул көндән, яңы барлыҡҡа килгән дәүләттең символы булараҡ, Мәскәүҙәге Аҡ йорттоң башында аҡ, күк һәм ҡыҙыл төҫтәге әләм елберҙәй башлай. Был тарихи ваҡиғанан һуң, 1994 йылда, ил Президенты “Рәсәй Федерацияһының Дәүләт флагы көнө тураһында”ғы Указға ҡул ҡуя. Һөҙөмтәлә был мөһим дата 22 август тип иғлан ителә.

Ҡануниәткә ярашлы, Рәсәйҙең Дәүләт флагы федераль властың, уның башҡарма органдарының биналарында, етәкселәрҙең бүлмәләрендә мотлаҡ булырға, рәсми һәм тантаналы сараларҙа файҙаланылырға тейеш. Ошо уҡ талаптар субъекттарға ла ҡағыла.

Закон менән яҡланған Дәүләт флагына кире мөнәсәбәт күрһәткән, тейешле формаһын күҙәтмәйенсә эшләгән, башҡа әләмдәр менән бергә ҡуйыу ҡағиҙәләрен үтәмәгән өсөн яуаплылыҡ ҡаралған.

Илебеҙҙә дәүләт символдарына иғтибар көсәйә бара. Дәүләт флагы көнөндә илһөйәрлек рухы менән һуғарылған тантаналы һәм мәҙәни саралар ойошторола.

Тимерғәле КИЛМӨХӘМӘТОВ,

– Дәүләт символдары күңелдә үҙ илең, Ватаның өсөн ғорурлыҡ тойғоһо уята – шул яғы менән дә ҡәҙерле улар. Мәҫәлән, ярыштарҙа Рәсәй әләмен күтәрһәләр, йөрәк ҡыуаныстан ашҡынып тибә башлай, рух арта. Шулай ҙа, минеңсә, илебеҙҙә Дәүләт флагына иғтибар биреп еткерелмәй кеүек. Күберәк урындарҙа елберҙәп, күңелдә ватансылыҡ, ғорурлыҡ хистәрен арттырып торһон ине ул.

Автор: Р. МУСИНА.

http://bashgazet.ru/politika/31301-ilyrlek-ineshe.html