Шағирә, Шәйехзада Бабич исемендәге дәүләт йәштәр премияһы лауреаты Лариса Абдуллина тыуған көнөн билдәләне

Шағирә, Рәсәйҙең һәм Башҡортостандың Яҙыусылар союзы ағзаһы, Шәйехзада Бабич исемендәге дәүләт йәштәр премияһы лауреаты Лариса Хашим ҡыҙы Абдуллина ошо көндәрҙә тыуған көнөн билдәләне. Уға ғүмер байрамы менән ихлас ҡотлайбыҙ һәм иң саф, иң изге теләктәребеҙҙе юллайбыҙ!

Әжәл ҡапҡалары

Иремдең синыфташы

Әжәл ҡапҡалары ҡайҙа икән:

Ер аҫтында, әллә күктәрҙә?

Бәндә ҡарыйлыҡҡа күсмәй тороп

Ниңә тормай улар биктәрҙә?

Әжәл ҡапҡалары бер асылһа,

Ябылырын, гүйә, онота.

Һорап тормай йәшен, затын да ул,

Барыһын да бергә ул йота!

Әжәл ҡапҡалары бик аяуһыҙ,

Күренмәгәндә лә күҙҙәргә

Тик бер хәбәр ишетеүҙән хатта

Нисәмә һыр сыға йөҙҙәргә.

Ғүмерҙәрҙең фанилығы бит был –

Оҙатабыҙ тағы бер ирҙе...

Әжәл ҡапҡалары көслө затҡа

Һис йәлләмәй урын-ҡәберҙе!

Ахырызаманда беҙ йәшәһәк тә

Түгел дә бит ахыры быуаттың...

Еңел булһын туған тупраҡҡайы –

Үҙебеҙҙе шулай йыуаттым.

Кем йыуатыр бына балаларын?

Бала әсәләрен кем яҡлар?

Әжәл ҡапҡаһына юллатмайса

Замананы беҙҙең кем һаҡлар?

Әжәл ҡапҡалары бер сик кенә,

Хозур донъялыҡтың аҙағы.

Доға ҡылайыҡ беҙ киткәндәргә!

Насип булмаҫ гүрҙең ғазабы...

Иле фарман бирһә, яуға сығыр,

Майҙандарҙы яулар ил ҡыҙы.

Ҡырғын килһә, түлен һаҡлар өсөн

Һабан һөрөр, тырмар, ер ҡаҙыр.

Афәт килһә, башын түбән эймәҫ,

Туплай алыр зирәк зиһенен.

Рәхәтлектәр эҙләп ситкә сапмаҫ,

Барын күтәрер ул ил менән.

Тура һүҙен күҙгә ҡарап әйтер,

Сабырлығын һаҡлар бәләлә.

Ул бит үлер саҡта йәшәй белә,

Ятып илар саҡта көлә лә.

Йөрәгенә тотош иле һыйған,

Тамыр йәйгән үҙе еренә.

Күкрәк һөтө – ғәзиз балаһына,

Саф һөйөүе – һөйгән йәренә.

Әйтерһең дә, тоғро һалдат кеүек,

Ил ҡыҙында – илдең хәстәре.

Шуға уның йырлы ҡараштары,

Ә йөҙөндә – иле төҫтәре.

Янсыҡ

Хәйерле юл, йәнем, хәйерле юл,

Иҫән генә йөрө һәр ерҙә.

Ҡайҙа ғына аяҡ баҫһаң да һин

Килһен бары яҡты хәбәрҙәр.

Хәйерле юл, бәғрем, хәйерле юл,

Юлдаш булһын һиңә теләгем.

Ғилем асҡыстарын бирһен Хоҙай!

Һинһеҙ генә ҡалыу йәл бөгөн...

Ваҡытлыса микән был хушлашыу?

Түҙеп булыр кеүек уға ла...

Әллә ниңә төштәремдә һының

Алыҫ офоҡтарҙа юғала...

Алыҫ офоҡтарҙа юғала ла,

Ҡояш булып ҡалҡа ҡабаттан.

Мин бит һине йәнә табыр өсөн

Мәңгелеккә, гүйә, оҙатам.

Хәйерле юл, йәнем, хәйерле юл!

Мөхәббәтем һине һаҡлаһын.

Әллә кемдәр һине һатҡанда ла,

Тыуған ерең генә һатмаһын!

Һатмаҫ та ул һине тыуған төйәк,

Ай, төрлө шул илдә әҙәмдәр...

Ысын йөҙөн аса ҡай берәүҙәр

Аҡтарылған саҡта сиҙәмдәр.

Аҡтарылған саҡта кеше йәне,

Ҡалмағандай унда мәрхәмәт.

Монаятым һиңә бер им булһын,

Йөрәгеңә инһә йәрәхәт!

Хәйерле юл, янсыҡтағы йәнем

Дәрүиш кеүек бергә ил гиҙер.

Йылдар үткәс беҙҙең мөхәббәттең

Бар тарихын илгә тергеҙер.

Хәйерле юл, исемкәйең менән

Ҡалам инде һөйөү ҡандырып.

Ә артыңдан утлы шауҡым-хәбәр

Күперҙәрең бара яндырып...

Туфан ҡалҡҡанмы ни?! Ауылдарым

Яуындарҙа ҡалған күшегеп.

Төбө тишелгән дә анау күктең,

Ҡоя ямғыр, гүйә, эше күп.

Бәндәләрҙең күпме көсө, сәме

Ағып ҡына китә бит инде!

Ҡара болот, ямғыр көткәндәр бар,

Зинһар өсөн, яума, үт инде!!!

Уттан ҡалмай, һыуҙан ҡала, тиҙәр,

Өмөтмө ни инде шул әйтем?

Ҡоштар, болоттарға бер сүллектең

Осоғоҙсо юлын күрһәтеп.

Барыһы ла иҫән генә булһын,

Тереләргә мал да табылыр.

Хоҙай үҙе ҡыҙыҡҡан был ерҙең

Михнәттәре киткән сағылыр...