Башҡортостанда үҫмерҙең өҫтөнә кирбес стена емерелеп төшкән

Башҡортостандың Федоровка районында 12 йәшлек малайҙың өҫтөнә кирбес стена емерелеп төшкән. Республика буйынса Тәфтиш комитеты хәбәр итеүенсә, Златоустовка ауылынан 12-14 йәштәрҙәге дүрт үҫмер мәктәп биләмәһендә уйнап йөрөгән. Кирбестән эшләнгән бәҙрәф эргәһендә булғанда, уның стенаһы емерелеп төшкән, уҡыусыларҙың береһе йәрәхәтләнгән һәм дауаханаға оҙатылған.

Тәфтиш комитеты тикшереү эше башлаған. Медицина ярҙамы күрһәтелгәндән һуң зыян күреүсенең сәләмәтлегенә зыян килтереү кимәле баһаланасаҡ. Шулай уҡ тәфтишсе мәктәптә хәүефһеҙлек техникаһы үтәлешен тикшерәсәк. Тикшереү һөҙөмтәләре буйынса процессуаль ҡарар ҡабул ителәсәк.

/«Башинформ» мәғлүмәт агентлығы/.