+30 °С
Болотло
Новости
28 Март 2018, 06:12
КҮМЕРҠАЛА
Лариса АБДУЛЛИНА КҮМЕРҠАЛА Төтөн еҫе сыға... Беҙ янабыҙ... Был хушлашыу көнө, моғайын. Һау булығыҙ яҡын туғандарым – Атай, әсәй, апай, ағайым!..
Лариса АБДУЛЛИНА
КҮМЕРҠАЛА
Төтөн еҫе сыға... Беҙ янабыҙ...
Был хушлашыу көнө, моғайын.
Һау булығыҙ яҡын туғандарым –
Атай, әсәй, апай, ағайым!..
Төтөн еҫе сыға... Беҙ янабыҙ...
Томанланған хатта ишектәр.
Битарафлыҡ тәҡдирҙәре беҙҙең
Яҙмыштарҙа булған бишектән.
Төтөн еҫе сыға... Беҙ янабыҙ...
Ялҡын теле бөтә тарафта.
Күмерҡалаға беҙ әйләнербеҙ,
Әйләнербеҙ йәки торфҡа.
Төтөн еҫе сыға... Беҙ янабыҙ...
Яндырғандар борон гел бикләп.
Әмәлдәре юҡ был сараларҙың,
Сығып булмай бынан имгәкләп...
Төтөн еҫе сыға... Беҙ янабыҙ...
Тик ялҡыны ҡалыр был ерҙә.
Балаларын ҡорбан иткән ҡала
Бар картала, бар ул Себерҙә...
Төтөн еҫе сыға... Беҙ янабыҙ...
Күмерҡаланың беҙ күмере.
Беҙ иҫкәртеү булдыҡ һәләкәткә,
Беҙ иҫкәртеү булдыҡ бар халыҡҡа...
Нәфсе ҡоло йәшәй, ул тере!..
