1 февралдә республикала ҡала-тирә поездарында юл хаҡы арта

2018 йылдың 1 февралендә Башҡортостанда ҡала-тирә поездарында юл йөрөү һәм йөк хаҡы арта. Башҡортостандың Транспорт һәм юл хужалығы буйынса дәүләт комитеты әҙерләгән республика Хөкүмәтенең ҡарар проекты әлеге ваҡытта кәрәкле килешеү процедураларын үтә.

Документ проектына ярашлы, сәфәр алыҫлығына ҡарамаҫтан тәүге 10 саҡрым өсөн юл хаҡы 20 һум тәшкил итәсәк (хәҙер ул 19 һум тора), унан һуңғы һәр саҡрым өсөн – ике һум (хәҙер 1,9 һум). Шул уҡ ваҡытта, республика биләмәһе буйлап йөрөткән Башҡортостан ҡала-тирә пассажирҙар компанияһы, Свердловск ҡала-тирә компанияһы һәм «Берҙәмлек» акционерҙар йәмғиәте «иҡтисади һәм технологик маҡсатҡа ярашлы булыуҙан сығып», үҙаллы юл йөрөү хаҡын төшөрә ала, тиелә ҡарар проектында.

Электричкаларҙа ғәмәлдәге юл һәм йөк хаҡы 2015 йылдың аҙағында билдәләнгән.

«Башинформ»дан.