Кардиология диспансерын яңыртыу 6 миллиард һумға төшә – Рөстәм Хәмитов

Республика кардиология диспансерының яңы корпусын төҙөү 6 миллиард һумға төшә. Башҡортостан Дәүләт Йыйылышы – Ҡоролтай ултырышында төбәк башлығы Рөстәм Хәмитов ошо хаҡта хәбәр итте.

– Проект бар. Баштан уҡ әйтәм, ул ҡиммәт – 6 миллиард һумға яҡын. Төҙөлөштөң хаҡы 2 миллиард һумдан кәмерәк, ҡалғандары – үтә заманса, юғары технологиялы ҡорамалдар, улар кардиология һәм ҡан тамырҙары хирургияһы өлкәһендәге теләһә ниндәй бурыстарҙы атҡарып сығырға мөмкинлек бирә, – тине Рөстәм Хәмитов. – Беҙгә мөмкинлектәребеҙҙе баһалап, ошо объектты төҙөй башларға кәрәк. Ул кәрәкле, мөһим. Республикала үлем осраҡтарының яртыһы йөрәк-ҡан тамырҙары сирҙәре менән бәйле булыуын беләбеҙ. Әгәр төҙөмәһәк, хәл үҙгәрмәйәсәк. Ахыр сиктә, кешеләрҙең һаулығы мөһимерәк. Халыҡтың сәләмәтлеге – иң ҙур ҡиммәт.

Хәтерегеҙгә төшөрәбеҙ, быйыл Өфөлә Республика онкология диспансерында поликлиника менән яңы палата корпусы һалына башланы.

Объекттың проект хаҡы 1,7 миллиард һум тәшкил итә. Яңы корпусты 2019 йылдың аҙағында – 2020 йылдың башында файҙаланыуға тапшырыу күҙаллана.

«Башинформ»дан.