Башҡортостан биш меңлек һөт сиген үтте – Рөстәм Хәмитов

Башҡортостан һауым буйынса биш меңлек сикте үтте. Был турала төбәк Башлығы Рөстәм Хәмитов республиканың Дәүләт Йыйылышы – Ҡоролтай ултырышында хәбәр итте.

— Быйыл республикала ауыл хужалығы өсөн бер һыйырҙан уртаса һауым 5 мең килограмм кеүек мөһим күрһәткескә өлгәштек, – тип билдәләне Рөстәм Хәмитов. – Был тәүге тапҡыр. Биш йыл элек республикала уртаса һауым 3 800 килограмм ине. Беҙгә 5 меңлек сикте үтер өсөн 4-4,5 йыл кәрәк булды.

Был күрһәткес – иң сикке түгел, тип һыҙыҡ өҫтөнә алды республика етәксеһе һәм Башҡортостан аграрийҙары яңы бурыс ҡуйҙы.

— Алдағы өс-дүрт йылда һәр һыйырҙан 6 мең килограмм һөт сигенә етербеҙ. Ул саҡта был ҡәнәғәтләнерлек һөҙөмтә була, – тине Рөстәм Хәмитов.

«Башинформ»дан.