Өфөлә баш ҡала уҡытыусылары өсөн һөнәри оҫталыҡ бәйгеһе башланды

20 декабрҙә Өфөләге Конгресс-холда XXI «Баш ҡаланың йыл уҡытыусыһы – 2018» һәм XIV «Баш ҡаланың башҡорт теле һәм әҙәбиәте йыл уҡытыусыһы – 2018» конкурстарын асыу тантанаһы үтте.

Ҡала бәйгеләре инновацион педагогик хәрәкәткә, һөнәри үҫешкә булышлыҡ итеү һәм уҡытыусы һөнәренең абруйын күтәреү маҡсатында йыл һайын ойошторола. 1997 йылдан алып уларҙа 2,5 меңдән күберәк уҡытыусы ҡатнашты, 400-ҙән ашыуы лауреат исеменә лайыҡ булды. Өфө уҡытыусылары «Йыл уҡытыусыһы» республика конкурсында 18 тапҡыр еңеү яуланы.

Быйылғы бәйгелә 65 уҡытыусы ҡатнаша. Уларға «Интернет-ресурс», «Эссе», «Уҡыу дәресе», «Методик семинар», «Оҫталыҡ дәресе», «Мәғариф проекты», «Түңәрәк өҫтәл» этаптарында һынау үтергә кәрәк. Йәш уҡытыусыларҙы дәртләндереү маҡсатында «Баш ҡаланың йыл уҡытыусыһы» конкурсында ҡатнашыусыларға — «Педагогик дебют», «Баш ҡаланың башҡорт теле һәм әҙәбиәте йыл уҡытыусыһы – 2018» конкурсанттары өсөн «Педагогик өмөт» номинациялары ҡаралған.