Йөҙ балл йыйыусы Рөстәм Хәмитов менән осрашты

Башҡортостан Башлығы Рөстәм Хәмитов Берҙәм дәүләт имтихандарын 100 балға тапшырған сығарылыш уҡыусылары менән осрашты. Республика буйынса йыйылған алты һәләтле уҡыусы араһында Мишкә егете Евгений Килдебаев та бар ине. — Рөстәм Зәки улы беҙҙе үҙенең эш урынында ихлас ҡаршы алды, иғтибар менән тыңланы, киләсәккә пландарыбыҙҙы һорашты. Башҡа ҡалаларҙа, хатта сит илдә уҡыһаҡ та, эшләргә үҙебеҙгә ҡайтырға тейешлегебеҙҙе һыҙыҡ өҫтөнә алды. Ул кадрҙарҙа ҡытлыҡ кисереүебеҙ, күпселек өлкәләрҙә белемле, үҙ-үҙенә ышанған белгестәр етмәүе тураһында һөйләне, _— тип тәьҫораттары менән бүлеште Мишкә ауылындағы Ф. Бүләков исемендәге 1-се лицейҙы уңышлы тамамлаған Евгений Килдебаев. Евгений Өфө дәүләт авиация техник университетына документтарын тапшырған, уның маҡсаты — юғары класлы программист булыу.