Мишкә районы педагогы "IВолга" йәштәр форумында ҡатнашты

Сара Һамар өлкәһендә үтә. Унда Волга буйы федераль округына ҡараған 14 төбәктән барлығы 2000 алдынғы ҡарашлы йәш кеше йыйыла. Улар араһында Мишкә районынан өҫтәмә белем биреү педагогы Валентина Янғыуатова ла бар.

Йәш педагог “Спорт һөйөүсе йәштәр — сәләмәт милләт” сменаһында ҡатнаша. Ул округ этабын үтеп, федераль этап финалына сыға. Уның ”Ҡаршылыҡтарҙың фәнни-ғәмәли һыҙығы” проекты юғары балл йыя.

«IВолга» – идеялар майҙаны, унда йәш ғалимдар, студенттар үҙ асыштарын ғәмәлгә ашырыу мөмкинлеге ала. Форумда бер нисә смена эшләй. Мәҫәлән, “Һин – эшҡыуар”, “Инновациялар һәм техник ижад”, “Мин – патриот” тигән йүнәлештәр бар. 10 көн дауамында йәштәр яңы идеялары һәм тәжрибәләре менән уртаҡлаша, ә иң яҡшы проекттар гранттар менән бүләкләнә.