Бай тарихлы юғары уҡыу йорто

Бөрө дәүләт педагогия институтының филология факультетында башҡорт-рус бүлеге 1996 йылда асыла, ә 2004 йылдан башҡорт–инглиз бүлегенә студенттар ҡабул ителә башлай. Уҡыу йортонда башҡорт бүлегенең асылыуына Башҡортостандың ул осорҙағы мәғариф министры Фирҙәүес Ғилметдин ҡыҙы Хисаметдинова, уҡыу йортоноң ректоры, профессор Салауат Мөҙәрис улы Усманов ҙур көс һала. Тап ошо хөрмәтле шәхестәр ярҙамында республиканың төньяҡ-көнбайыш райондары өсөн башҡорт теле һәм әҙәбиәте уҡытыусылары әҙерләнә. Шуныһы ҡыуаныслы, бөгөнгө оптимизация сәйәсәтендә лә бүлек бюджет урыны менән тәьмин ителгән. Әгәр былтыр бүлекте 18 студент тамамлаһа, беренсе курсҡа 16 ҡабул ителде.
Уҡыу йортона башлыса төньяҡ-көнбайыш райондарҙан белем алырға киләләр. Шулай ҙа һуңғы йылдарҙа Ҡыйғы, Салауат, Дыуан, Йылайыр райондарынан студенттар килә.
Сығарылыш уҡыусыларыбыҙ республикабыҙҙың төрлө мәктәптәрендә һәм колледждарында эшләп йөрөй. Араларында баш ҡалала даими уҙғарылып килгән “Башҡорт теле һәм әҙәбиәте йыл уҡытыусыһы” төбәк-ара конкурсында ҡатнашып, Гран-при һәм беренсе урын яулаусылар булыуы һөйөндөрә. Шулай уҡ уҡыуҙарын магистратурала һәм аспирантурала дауам итеүселәр, фән кандидаты ғилми дәрәжәһенә өлгәшеүселәр бар.
Студенттарҙа фәнни ҡараш булдырыу өсөн дә ентекле эш алып барыла. Улар Рәсәй һәм халыҡ-ара фәнни-ғәмәли конференцияларҙа ҡатнаша. Күрше өлкәләргә һәм республика райондарына экспедицияға йөрөйҙәр, халыҡтың ауыҙ-тел ижады өлгөләрен йыйҙылар. Һәр бер эштең һөҙөмтәһе айырым йыйынтыҡ булып донъя күрә бара.
Студенттарға буш ваҡыттарын файҙалы үткәреү өсөн төрлө саралар ойошторола.

Силәбе өлкәһе Арғаяш районының Оло Усман ауылы ҡыҙы, башҡорт-рус бүлегенең 3-сө курс студенты Ләйлә Шәһисолтанова спорт өлкәһендә ҙур ҡаҙаныштар яулап өлгөрҙә. Спорт мастеры мас-рестлинг буйынса Рәсәй һәм Башҡортостан копилкаһын байтаҡ алтын һәм көмөш миҙал менән байытты.
Уҡыу буйынса юғары һөҙөмтәләргә өлгәшкән һәм йәмәғәт эшендә әүҙем ҡатнашҡан студенттарға йыл һайын Һәҙиә Дәүләтшина исемендәге махсус премия бирелә. Былтыр был премияға Илшат Ҡазыханов эйә булһа, быйыл 3-сө курстан Аделина Шәмсиева лайыҡ тип табылды.

Йәштәргә ҡәләм тибрәтеү, ижади һәләттәрен үҫтереү өсөн дә мөмкинлек тыуҙырылған. Улар факультетта эшләп килгән «Бөрө шишмәләре» башҡорт журналистикаһы түңәрәгендә шөғөлләнә. “Башҡортостан”, "Йәнтөйәк" гәзиттәрендә лә мәҡәләләре баҫылып тора. “Йәнтөйәк” район-ара гәзите менән хеҙмәттәшлек итеп, уның йөкмәткеһен байытыуға һәм туған телде һаҡлауға, үҫтереүгә үҙ өлөшөн индергән Аделина Шәмсиеваға, Камила Мөхәмәтоваға, Илшат Ҡазыхановҡа редакцияның Рәхмәт хаттары тапшырылды. Улар шулай уҡ Милли әҙәбиәт музейы ойошторған “Батырҙар дәүере” конкурсында ҡатнашып, махсус хәрби операция яугирҙарына уҡыу йорто студенттары индергән өлөштө тасуирлаған видеояҙма менән 1-се урын яуланы. Шулай уҡ Бөрө студенттары “Ашҡаҙар” радиоһы ҡунағы булды.
Дыуан районы Мәсәғүт ауылында Бөтә донъя башҡорттары ҡоролтайы башланғысы менән «Ижади майҙан» күсмә комплекслы сараһы үткәйне. Унда Бөрө районы һәм ҡалаһы башҡорттары ҡоролтайы рәйесе, ойошма ағзалары менән бер рәттән студенттар ҙа ҡатнашты.

ӨФһТУ-ның Бөрө филиалында күренекле яҙыусылар, шағирҙар менән даими осрашыуҙар үткәрелә. Таңсулпан Ғарипова, Ринат Камал кеүек шәхестәр менән фекер алышыуҙар студенттарҙың хәтерендә оҙаҡ һаҡланыр.
Филиалда Башҡорт теле һәм Туған телдәр көнөнә арналған күркәм саралар бик матур һәм фәһемле үтә. Уларҙа «Башҡортостан тарихы», “Рәми Ғариповтың тормошо һәм ижады”, “Ил ағаһы Мостай Кәрим” кеүек темаларға квиз уйындары, иртәлектәр ойошторола. Буласаҡ уҡытыусылар үҙҙәре үк мәктәп балалары өсөн «Атам теле, әсәм теле – минең телем» исемле мульти-мәҙәни квиз үткәрә. Башҡорт телендәге тоталь диктант та филиал базаһында уҙа.
Шулай уҡ даими рәүештә ойошторолған «Һылыуҡай» конкурсында төрлө факультеттарҙан һайлап алынған иң сибәр һәм талантлы башҡорт ҡыҙҙары һылыулыҡта, саялыҡта, аш-һыуға оҫталыҡта көс һынаша. Һәр төр байрамға, иҫтәлекле даталар айҡанлы тасуири шиғыр һөйләү конкурстары йәнле үтә.
Быйыл туғыҙынсы тапҡыр үткәрелгән “Ваҡыт йылғаһы” фестивале тарихи мираҫты тергеҙеү, хөрмәт итеү һәм һаҡлауҙың әһәмиәтлеген күрһәтте.
Ғөмүмән, Өфө фән һәм технологиялар университетының Бөрө филиалында студенттарҙың юғары белем алыуына, ижади һәләттәрен үҫтереүгә барлыҡ шарттар тыуҙырылған, тип хаҡлы рәүештә әйтә алабыҙ.

Ғәлиә Ғәниева.
Бөрө районы.