Йәш уҡытыусылар 690 мең һум күләмендә грант аласаҡ

Педагог һөнәренең абруйын күтәреү һәм йәш уҡытыусыларға ярҙам итеү маҡсатында 2019 йылдан Башҡортостан Республикаһы Башлығы Радий Хәбировтың Указына ярашлы, ауыл ерендә эшләгән йәш уҡытыусыларға гранттар булдырылды. Йыл һайын конкурс йомғаҡтары буйынса еңеүселәр билдәләнә һәм йәш педагогтарға 690 мең һум күләмендә гранттар түләнә.

Быйыл конкурсҡа иң күп ғаризалар Әбйәлил, Баҡалы, Бәләбәй, Бөрйән, Ғафури, Дыуан, Дүртөйлө, Ейәнсура, Илеш, Ҡариҙел, Ҡырмыҫҡалы, Туймазы һәм Өфө райондарынан килгән.

Конкурста 35  йәшкә тиклемге йәш уҡытыусылар ҡатнаша ала. Улар халҡы 20 мең кешенән артмаған ауыл ерендә белем бирергә тейеш. Конкурс шарттарына ярашлы, еңеүселәр ауыл мәктәбендә кәм тигәндә 10 йыл эшләргә бурыслы.

2024 йылда конкурсҡа документтар 1 февралдән 31 майға тиклем ҡабул ителде. Бөтәһе 180 ғариза килгән. 11-28 июндә Эксперт комиссияһы ауыл ерендә эшләгән йәш уҡытыусылар тәҡдим иткән белем биреү проекттарына һәм грантҡа дәғүә итеүселәрҙең һөнәри эшмәкәрлегендәге ҡаҙаныштарына баһа бирҙе.

– Белем биреү проекттарының йөкмәткеһен һәм грантҡа дәғүә итеүселәрҙең профессиональ эшмәкәрлеген балл менән баһалау нигеҙендә грантҡа дәғүә итеүселәрҙең рейтингы төҙөлдө. Комиссия ултырышында йәш уҡытыусыларға гранттарға дәғүә итеүгә һайлап алыуҙа 150 еңеүсенең исемлеге ҡаралды һәм раҫланды, – тип һөйләне БР мәғариф һәм фән министры Илдар Мәүлетбирҙин.

Ултырыш йомғаҡтары буйынса Андрей Назаров БР Мәғариф һәм фән министрлығына муниципаль район хакимиәттәре башлыҡтары менән берлектә һөҙөмтәле мәғлүмәт кампанияһын үткәрергә һәм киләһе йылда конкурста теләгән һәр кемдең ҡатнашыуын тәьмин итергә ҡушты.

Фото: pravitelstvorb.ru