Гөлнур Ҡолһарина депутат вәкәләттәрен һалды

Бөгөн Башҡортостан Дәүләт Йыйылышы – Ҡоролтайҙың пленар ултырышында депутат Гөлнур Ҡолһарина вәкәләттәрен ваҡытынан алда туҡтатты. Был ҡарарҙы ҡабул итеүен ул МХО-ла ҡатнашыусыларға, уларҙың ғаиләләренә булышлыҡ итеү эшенә иғтибарҙы арттырыу теләгенә бәйләп аңлатты, тип хәбәр итте «Башинформ» мәғлүмәт агентлығы.

«Бөгөн Башҡортостан Республикаһы Дәүләт Йыйылышы – Ҡоролтайҙың пленар ултырышында депутат вәкәләттәрен һалдым. Беҙ ҡатмарлы заманда, саҡырыуҙар ваҡытында йәшәйбеҙ. МХО-ла ҡатнашыусыларға, уларҙың ғаиләләренә ярҙам итеү буйынса эшмәкәрлек күп көс, иғтибар һәм фиҙакәрлек талап итә. Беҙҙә яңы эшмәкәрлек йүнәлештәре барлыҡҡа килә, яңы проекттарҙы ғәмәлгә индерәбеҙ һәм булғандарын үҫтерәбеҙ. Эшебеҙҙең девизы – республика Башлығы Радий Хәбиров тарафынан әйтелгәнсә – «Барыһы ла Еңеү өсөн!» - тип билдәләне Гөлнур Ҡолһарина.

Бөгөнгө ултырышта Гөлнур Ғәлинур ҡыҙын «Хәйриә һәм әүҙем йәмәғәт эшмәкәрлеге өсөн» почёт билдәһе менән бүләкләнеләр.

“Был награда – минең генә түгел, бөтә берҙәм коллективыбыҙҙың да ҡаҙанышы, тип иҫәпләйем. Команданың һәр ағзаһы дөйөм эшкә – МХО ветерандарына һәм уларҙың ғаиләләренә ярҙам итеүгә ҙур өлөш индерә. Эшмәкәрлегебеҙҙе юғары баһалағандары өсөн Башҡортостан Республикаһы Дәүләт Йыйылышы - хеҙмәттәштәрегеҙгә рәхмәт белдерәм!” – тип яҙҙы социаль селтәрҙәге сәхифәһендә Гөлнур Ғәлинур ҡыҙы.

Гөлнур Ҡолһарина ике саҡырылыш Башҡортостан Республикаһы Дәүләт Йыйылышы – Ҡоролтай депутаты булды.

Фото: Г. Ҡолһаринаның социаль селтәрҙәге сәхифәһенән (vk.com/gulnurkulsarina)