Балтас районында туризм йылдам үҫешә

Көндәшле ауылында глэмпингты Лиана һәм Илдар Сәхиповтар ғаиләһе асырға әҙерләнә.  Улар дәүләт тарафынан ярҙам алған һәм үҙ аҡсаларын да өҫтәгән. Заманса А-фрейм стилендә инновацион өйҙәр булдырыу хыялын тормошҡа ашыра башлағандар.

• Башҡа райондарҙа бындай заманса ял итеү урындарын күргән бар ине. Беҙгә бик оҡшаны һәм районыбыҙҙа ла шундай урын яһарға булдыҡ. Бының өсөн бирелә барыһы ла бар — матур ер, күл, һоҡланып туя алмаҫлыҡ тәбиғәт. Бер ниндәй ярҙамһыҙ ҙур эштәр башҡарып сығып булмай. Бәхеткә, район, республика буйынса туризм йүнәлеше һуңғы йылдарҙа ныҡлы үҫеш алды. Үҙ эшеңде башлап ебәрер өсөн төрлө гранттар, субсидиялар бар. Беҙгә эшебеҙҙе башлап ебәрергә “Туризм һәм ҡунаҡсыллыҡ индустрияһы” милли проекты ярҙамға килде, — тип һөйләй Илдар Сәхипов глемпинг комплексы менән таныштырғанда.

Туристарға уңайлы булһын өсөн Сәхиповтар ваҡ-төйәккә ҡәҙәр иғтибар итә: мунса комплексы, быуа, махсус һуҡмаҡтар, һәр өйҙөң үҙ мангал мөйөшө, декоратив ағастар һәм ҡыуаҡтар, ҡыш көндәрендә тюбингта шыуыу урыны, мотоциклдарҙа һәм квадрациклдарҙа йөрөр өсөн “Джип-триал” трассаһы, фотоға төшөү мөйөшөн булдырыуҙы ла күҙ уңында тота улар. Фотозона өсөн бер урында фацелия сәскәләре ултыртылған.

Әлегә алты заманса өй сафҡа инергә әҙерләнә. Уларҙың һәр береһе дүрт кешенән торған компанияны һыйҙыра. Сәхиповтар тағын да киңәйеүҙе күҙ уңында тота — булғандарына өҫтәп ике өй төҙөргә уйлайҙар.

“Туризм һәм ҡунаҡсыллыҡ индустрияһы” милли проекты сиктәрендә балтастарға районда рәхәтләнеп ял итеү урындары булдырыу — үҙе бер ҡыуаныслы хәл.

Фирғәт Нәбиуллин.