Һалдат ҡайышы тағыу — ғорурлыҡ

Көҙгө саҡырылыш кампанияһы дауам итә. Балтас егеттәренең илебеҙҙе һаҡларға теләктәре көслө, яҡташтарыбыҙҙың күбеһе өсөн һалдат ҡайышы тағыу — ғорурлыҡ. Саҡырылыш осоро башынан уҡ районыбыҙҙан бер нисә төркөм егет хәрби хеҙмәткә юлланды. Күптән түгел генә сираттағы тантаналы оҙатыу сараһы уҙҙы.
Атай-әсәйҙәре, өләсәйҙәре, күршеләре, ауылдаштары йәш егеттәргә йылы теләктәрен еткерергә ашыҡты. Бер юлы тиҫтәнән артыҡ райондашыбыҙ тыуған яҡтарын ваҡытлыса ҡалдырып, юлға сыҡты. Йыраҡ юл, тыуған ерҙәренән, туғандарынан айырылыу миҙгеле күңелдәрен шомландырһа ла, егеттәр сер бирмәне. Үҙҙәрен ҡыйыу һәм тыйнаҡ тоттолар, күтәренке рухта юлға ҡуҙғалдылар.
Хәрби хеҙмәткә юлланыусыларҙың береһе — Алмаз Шәйхлисламов. Уртайылға ауылы егете Түбән Һикеяҙ урта мәктәбен тамамлай. Артабан яғыулыҡ-энергетика колледжында һөнәр үҙләштерә.Һуңғы курстарҙа тырыш егет “Башнефть” заводында слесарь булып та эшләй.
Атайым да, олатайым да Ватан алдындағы бурысын лайыҡлы үтәгән. Улар минең өсөн ысын ир-егет өлгөһө булып тора. Хәҙер миңә лә хәрби бурысты үтәргә ваҡыт етте. Армияға теләк менән барам, был минең өсөн мөһим, — ти Алмаз.
Тулыраҡ Йәнтөйәк  гәзитенең 22 ноябрҙә  сығасаҡ һанында уҡый алаһығыҙ.

Фирғәт Нәбиуллин.

Балтас районы.