Йәш инспекторҙар форумға барҙы

500-ҙән ашыу баланы, педагогтарҙы берләштергән ҙур  сара йәш инспекторҙар хәрәкәтенең ойошторолоуына 50 йыл тулыу айҡанлы уҙғарылды. Унда Башҡортостан Республикаһының мәғариф һәм фән министры Айбулат Хажин, Башҡортостан Республикаһы  Юл хәрәкәте хәүефһеҙлегенең баш  дәүләт инспекторы Владимир Севастьянов, “Юл хәрәкәтенең йәш инспекторҙары” юл хәрәкәте хәүефһеҙлеген пропагандалау буйынса Бөтә Рәсәй йәмәғәт балалар-үҫмерҙәр ойошмаһы рәйесе Валентина Кульбицкая һәм башҡа мәртәбәле ҡунаҡтар ҡатнашты һәм сығыш яһаны.

Асҡындан республика форумына райондың юл хәрәкәте хәүефһеҙлеге дәүләт инспекцияһы инспекторы Павел Крапивин, район мәғариф бүлегенең мәғлүмәт-методика үҙәге методисы Гөлназ Әхмәтова һәм  класс етәкселәре Рәзилә Басимова менән Асҡын 2-се урта мәктәбенең 6-сы А класы уҡыусылары — Сабина Мөхөтдинова, Гүзәл Махатова, Илназ Әхмәтов, Эмиль Кәримов барҙы. Асҡын 2-се мәктәбенең йәш инспекторҙары сараға үткән йылғы республика конкурсында еңеүсе булараҡ саҡырыла.

Тантаналы өлөштән һуң форум эше туғыҙ тематик майҙансыҡтарҙа дауам итте. Уларҙа Асҡын уҡыусылары ла ҡатнашып, белемдәрен арттырҙы, тәжрибә байытты. Форумда ҡатнашыусы балаларға иҫтәлекле бүләктәр тапшырылды.