Афған һуғышы — әсәләрҙең йөрәк яраһы

Ҡунаҡтарҙы һәм сарала ҡатнашыусыларҙы район хакимиәте башлығы Илгиз Субушев сәләмләне. Шулай уҡ Балтас һәм Тәтешле райондары хәрби комиссары Ансар Арысланов, төньяҡ райондарҙың Афған ветерандары берекмәһе рәйесе Рәфис Закиров сығыш яһаны.

Сарала Башҡорт төньяҡ-көнбайыш ауыл хужалығы колледжы уҡыусылары ла ҡатнашты һәм Афған ерендә хәрби бурысын үтәгән яугирҙарҙың сығышын иғтибар менән тыңланы.

Балтас районынан Афған ерендә 1979 йылдан алып 1989 йылға тиклем 153 кеше үҙенең интернациональ бурысын үтәй. Ошо һуғышта ете райондашыбыҙ һәләк була. Шуларҙың алтыһы үлгәндән һуң Ҡыҙыл Йондоҙ ордены менән бүләкләнә.

Илһөйәрлек менән һуғарылған осрашыуҙа ойоштороусылар ҡатнашыусыларҙы Ҡыҙыл Йондоҙ ордены менән бүләкләнгән Фидүс Шәртдиновтың туғандарына яҙған хаты менән дә таныштырҙы.

Район ветерандар берекмәһе рәйесе Рифат Сафин тантаналы рәүештә афғансыларға “СССР төҙөлөүҙең 100 йыллығын билдәләү уңайынан” иҫтәлекле миҙалын тапшырҙы.

Осрашыуҙа район яугирҙары тураһында китап сығасағы тураһында иғлан ителде. Уның өҫтөндә ҙур эш алып барған Гүзәл Камалтдинова китап өсөн материалдарҙың нисек тупланыуы тураһында һөйләне.

Сара Руслан Халиҡов һәм Радмир Ғәлиевтың илһөйәрлек менән һуғарылған йырҙары менән үрелеп барҙы. Шулай уҡ афғансыларға арналған күргәҙмә күрһәтелде.

Фирғәт Нәбиуллин.