Изге эшкә ихлас ҡушылдылар

Был изге эште ауыл ағинәйҙәре ойоштора һәм ауыл халҡы ихлас ҡушыла. Һәр кем хәленән килгәнсә ярҙам итергә тырыша: йылы ойоҡбаштар, тиҙ боҙолмай торған аҙыҡ-түлек, йыуыныу әйберҙәре байтаҡ ҡына йыйыла.

• Районыбыҙҙан киткәндәргә, шулай уҡ үҙебеҙҙең ауылдан да хәрби операцияла ҡатнашыусы ир-егетебеҙгә ярҙам ебәреү эшен һаҡ ҡына башлағайныҡ, ауылдаштарыбыҙ ҙур теләк менән ҡушылды. Һәр кем ҡулынан килгәнсә ярҙам итте. Йыйылған әйберҙәрҙе, аҙыҡ-түлекте айырып тартмаларға тултырып, Асҡынға йыйыу пунктына илтеп тапшырҙыҡ. Изге ғәмәлгә ҡушылыусы ауылдаштарыма ағинәйҙәр исеменән оло рәхмәттәремде еткерәм. Ир-егеттәребеҙгә беҙ ебәргән әйберҙәрҙең барып етеүен, уларҙың һәр береһенең тыуған йортона иҫән-имен әйләнеп ҡайтыуын теләйбеҙ, — ти рухлы, әүҙем ағинәй, мәҙәни саралар ойоштороусы Гөлнара Шәмселислам ҡыҙы Шәйхинурова.

Илһөйәр Махатова.