Беҙҙең халыҡ өмә йәнле булған,
Ауыр эште күмәк күтәргән.
Мал һуйһа ла, ҡаҙҙар йолоҡһа ла,
Өй һалһа ла өмә үткәргән.
Ҡаҙ өмәһе — көҙгө муллыҡ билдәһе, хужабикәләрҙең уңғанлығына ишара. Ауыл халҡының, күршеләрҙең, туғандарҙың татыулығы, берҙәмлеге ошондай өмәләрҙә сағыла. Солтанай ауылында йәшәүсе өлгөр, егәрле хужабикә Рәйсә Сәләхетдинова ла йыл да күпләп ҡош-ҡорт аҫрап, көҙөн күрше-тирәләре менән уларҙы бергәләп эшкәртеп ҡуялар.
Солтанай ауылында йыл да күпләп ҡаҙ ҡараусы ғаиләләр байтаҡ. Киләһе йылдарҙа ла шулай уңған хужабикәләрҙең ҡош-ҡорттары ишле, донъялар имен булып, ауылдарҙа өмәләр гөрләп үтһен!