«Йәшлек» яңы үрҙәр яулай

“Ҡазан һөлгөһө” исемен фестиваль-конкурс боронғо татар халыҡ йыры атамаһынан алған. Ҡәрҙәш халҡыбыҙ өсөн ап-аҡ туҡымаға оҫта ҡулдар сиккән милли нағыштар – кешенең рухи хазинаһы, Һабантуй байрамы символы.

Ансамблдең өлкәндәр төркөмө “Ураҡ өҫтөндә” бейеүе менән 1-се дәрәжә, солистар Айгөл Мирхәйҙәрова, Лилияна Ғилмиярова, Нәзилә Ғәлинурова 2-се дәрәжә лауреат исеменә лайыҡ булды. Үҙ йәш категорияларында солистар — Әлиә Ғилуанова һәм Камила Исламова, ансамблдең төп төркөмө бейеүселәре лә 1-се дәрәжә лауреат исемен яуланы.

— Бейеүселәремдең уңыш сере — бейеүҙе күңел һалып башҡара белеүҙәрендә. Ундайҙар ниндәй генә һөнәргә эйә булһа ла, юғалып ҡалмай, үҙ бейеклектәрен яулай, — тип ҡыуана ансамблдең художество етәксеһе Рәфилә Мөғәллим ҡыҙы.
“Йәшлек”тәргә артабан да ижади илһам теләйбеҙ. Районда эшләп килгән бына шундай һәләтле, дарманлы бейеү коллективтары республикабыҙ мәҙәниәтен күтәреүгә тос өлөш индерә.

Гөлнара Солтанова.

Ҡариҙел районы.