Шишмәләр төҙөкләндерелә

Үгеҙ ауыл биләмәһе башлығы Рәзиф Рәхмәтуллин билдәләүенсә, халыҡты яҡшы сифатлы эсер һыу менән тәьмин итеү — муниципалитеттың төп мәсьәләләренең береһе. Был проблема бигерәк тә бәләкәй ауылдарҙа киҫкен тора, бында үҙәктән һыу менән тәьмин итеү тураһында хыялланып та булмай.
— Шәхси ҡоҙоҡтарға һәм скважиналарға, шулай уҡ шишмәләргә баҫым яһаныҡ, бәләкәй һәм ҙур шишмәләр беҙҙә 10-ға яҡын, — тип аңлата Рәзиф Назиф улы. — Уларҙы төҙөкләндереү ҡиммәткә төшкән эш. Үҙебеҙҙең аҡсалар ғына етмәй. «Башҡортостан Республикаһының экологияһы һәм тәбиғәт ресурстары» программаһына ҡушылырға булдыҡ һәм 2020 йыл аҙағында заявка бирҙек.
Эш ырамлы бара. 100 мең һум грант оталар һәм үткән йыл проектты тормошҡа ашыралар — Шишмә ауылында шишмәне төҙөкләндерәләр. Шулай уҡ Романовкала ла, бында эш “Аныҡ эштәр” партия проекты буйынса һәм республика бюджеты аҡсаларына башҡарыла.
Экологик программала ҡатнашырға үткән йылда ла заявка ебәрәләр, ләкин конкурстан үтмәйҙәр. Шулай булһа ла, йәй бушҡа үтмәй. Ауыл һәм республика бюджеты аҡсаларына Үгеҙ ауылында Әдиә шишмәһен төҙөкләндерәләр.
Ауыл хакимиәте эштәре менән идара итеүсе Вероника Саҙретдинова оҙатыуында шул урынға барабыҙ. Шишмә урман эсендә шаулап ағып ята. Уға барып етер өсөн тимер баҫҡыстан төштөк, Таулинка йылғаһы аша ике күперҙән сыҡтыҡ. Уның ағастан эшләнгәне быйыл йәй төҙөлгән.
— Иң тәүҙә бирелә биләмәне таҙарттыҡ, иҫкергәндәре урынына ике яңы түңәрәк урынлаштырҙыҡ, — тип һөйләй Вероника Ренат ҡыҙы. — Профнастил менән кәртәләп алдыҡ, эскәмйәләр ҡуйҙыҡ, ағас түшәнек. Бик матур һәм уңайлы килеп сыҡты. Шишмәгә баҫыу юлы буйлап та килергә мөмкин, ләкин унда төшөргә текә. Киләһе йәйгә баҫҡыс эшләргә планлаштырабыҙ.
Быйыл ауыл халҡы Үгеҙ һәм Романовка ауылдары уртаһында урынлашҡан Йылы шишмәне төҙөкләндереү проекты менән тағы ла экологик программаға инергә тырышып ҡараны. Шишмә ауыл халҡы араһында ла, бөрөләр араһында ла киң билдәле. Һыуы юғары сифатлы һәм тәмле булыуы менән айырыла. Бирелә инә торған урынды төҙөкләндереүҙән алып түңәрәктәр ҡуйыуға тиклем ҙур эш башҡарырға кәрәк.
— Заявка айырым ауылдан бирелә, — тип программала ҡатнашыу тәжрибәһе менән уртаҡлаша Рәзиф Рәхмәтуллин. — Проекттың кәрәклегенә, мөһимлегенә комиссия инанырлыҡ итеп аңлатма ҡағыҙы яҙырға кәрәк. Документтарҙы тапшырғандан һуң тағы ла ниндәй ҡағыҙҙар кәрәклеген даими һорашып торорға, министрлыҡ менән бәйләнештә булырға кәрәк. Тик ятҡан таш аҫтына һыу аҡмай, тиҙәр бит.

Ольга Платонова.
Бөрө районы.