Еңеүселәрҙе билдәләйәсәктәр

27 февралдә Өфөлә, “Башҡортостан” дәүләт концерт залында "Өлгөлө башҡорт ғаиләһе" асыҡ республика конкурсы еңеүселәрен һәм призерҙарын бүләкләү тантанаһы уҙасаҡ.

Конкурсты ойоштороусылар - Башҡортостан Республикаһының Мәҙәниәт, Ғаилә, хеҙмәт һәм халыҡты социаль яҡлау министрлыҡтары, Бөтә донъя башҡорттары ҡоролтайы, Халыҡтар дуҫлығы йорто.

Бәйгенең зона этабы онлайн-форматта республиканың ете зонаһында - Мәләүез, Туймазы, Тәтешле, Салауат райондарында, шулай уҡ Сибай, Нефтекама һәм Өфө ҡалаларында уҙҙы. 

Конкурста башҡорт телендә һөйләшкән һәм өс кешенән дә кәм булмаған ғаилә ағзалары булған бөтә теләүселәр ҙә ҡатнаша алды. Бәйгеселәрҙең йәше сикләнмәне.

Жюри "Ғаилә ижады", "Ғаилә һөнәре", "Ғаилә ҡиммәттәре" номинациялары буйынса видеороликтар рәүешендәге ғаиләләрҙең ижади презентацияларын баһаланы. Республика этабына үткән 21 финалсы билдәләнде.  Улар араһында жюри өс номинация буйынса еңеүселәрҙе һәм гран-при хужаларын билдәләйәсәк.

Сара ғаилә институты абруйын нығытыуға, халыҡты республиканың мәҙәни киңлегенә әүҙем йәлеп итеүгә,  әхлаҡи-эстетик нигеҙ булдырыуға, башҡорт фольклорын һаҡлау һәм үҫтереүгә, ғаилә ҡиммәттәрен популярлаштырыуға йүнәлтелгән.

Инеү бушлай.

Фото рәсми сығанаҡтан.